Kum kaltaah Dragonfruit leh zikhlum atangin cheng vbch. 6+ lei chhuak

Kum kaltaah Dragonfruit leh zikhlum
atangin cheng vbch. 6+ lei chhuak
Sawrkar kum kalta chhung khan Dragonfruit leh zikhlum thartuten a vaiin cheng vaibelchhe 6 chuang ve ve an leichhuak a, tomato chingtute pawhin vbch.5 chuang an leichhuak.
Minister of state Prof. Lalnilawma enkawl department – Horticulture, Rural Development leh PHE hnathawh chu chief minister Lalduhoma hoin thlirlet a ni a. Heta Horticulture department hotute sawi danin, kum khat kalta chhung khan an department hnuaia loneituten Dragonfruit atangin cheng vaibelchhe 6.96, balhla atangin vbch. 4.17, lakhuihthei atangin vbch. 2.52, tomato atangin vbch. 5.74, dawnfawh atangin vbch. 3.49 leh zikhlum atangin vbch. 6.57 vel an tharchhuak a ni.
Sawrkar flagship programme, Handholding Scheme hnuaia thlai thar lei tur thlan chhuah pali zinga pathum hi Horticulture hnuai ami a nih angin an inbuatsaihna leh an hmalakna dangte chief minister hmaah hian an sawifiah a. Horticulture department hian an hmalakna zawng zawng Handholding Scheme hnuaia luhpui (converge) vek an tum thu an sawi a ni.
Public Health Engineering department hian JJM hnuaiah Water Supply Scheme 852 an kalpui a. Heng zinga 657 hi gravity hmanga lak a ni a, 188 hi solar pump niin, grid power pump 7 a awm. WSS 852 zinga 832 hi a ruhrel (physical) zawhfel tawh niin, hna kal mek 20 an la nei. NABARD fund atangin Water Supply Scheme kal mek 11 an nei bawk.
SASCI hmanga hmalakna, NESIDS fund hmanga hnathawh mek Aizawl, Lunglei, Mamit leh khawpui danga tuilak hna an thawh mek, Tawi tlang tui hna gravity hmanga thawh mek, Swatch Bharat Grameen hmalakna pawh an sawizau a. Cyclone Remal an tawrh nasat thu leh Aizawl tuilak pawhin ngai a la awh theih loh thu an sawi a ni.
Rural Development department hnuaiah programme liantham panga an thawh mek dinhmun chief minister hmaah hian an sawifiah a. Sawrkar kum kal meka ni za inhlawhna an kalpui dan, ‘Project Rotling’ an kalpui mek dan, Social Audit Unit hmalak dan, MzSRLM hmalakna, SIRD&PR leh BADP hmalakna, department dinhmun, Vibrant Village Programme lokal tur, RMIS leh an hnathawh dangte an sawi a ni.
Department hnathawh tha lo emaw an chak lohna hmuhchhuah tuma thlirlet an ni hran loa, department hmalak dan hriatpui a, thawhhona tha zawk neih leh an harsatna tawh mek inhriatsakna atante, hmasawnna chak zawk a awm theihna atantea ti an ni tih chief minister hian a sawi a. “Kan tumna a rei tawh a, vawiinah a bul kan tan thei ta a, a hlawk ka ti hle,” a ti.