Kum li leh a chanve tang tur Alves

Kum li leh a chanve tang tur Alves
Spain ram Catalonia biala an court sang ber chuan Barcelona defender hlui Dani Alves-a pawngsual thubuaiah Ningani khan thuremna a tichhuak ta a, Barcelona chuan an puhnaah Brazilian chu thiamloh a chantir a, kum li leh a chanve chhung lung in tang tur leh pawngsual tawktu hnena euro 150,000 (USD 163,000) chawi turin a hrem.
Kum 40 mi Alves hi pawngsuala puhtu chuan kum 2022 khan Barcelona khaw nightclub toilet chhungah thlemlutin a pawngsual tih court a hrilh a; police hnena thubuai a thehluh hnuah nikum January thla khan police-in manin, bail dil thin mah se khungbeh a nih loh laia an ram Brazil lama a putbo hlauhna avangin bail phalsak a ni lo a, tunhnaia a chungchang court-a ngaihtuah a nih thleng khan lung inah a tang ngar ngar a, thiam a chan zawh tak loh avangin a tang zui ngar ngar dawn a ni!
Tarlan tawh thin angin, South American footballer dang thenkhat, entirna’n Neymar tih angte pawh Europe-a an khawsakna hmunah lung in tan theihna thubuai awrhtir an lo ni ve tawh thin tho a, mahse, an thubuai neihna ram an chhuahsan hman avangin lung in an rap lo a ni mai a, Dani Alves erawh Spain ram tlanchhuahsanna hun pek a nih eih loh avangin a duh aia rei tang erh dawn a nih hmel!
Brazilian footballer Alves hian pawngsuala puhtu kha a hriat ngai loh thu sawi zet mah se a hnu lamah erawh an pahnih remtihdunna ngeia chesual an nih thu court a hrilh leh hnuhnawh a; thubuai ngaihtuah laiin thuhretu hrang hrang inlan zingah case a awrh hnua inthenna thehlut ta a nupui hlui bakah pawngsual tawka puhtu thiante pawh an tel a, Barcelona court-in trial a kalpui hnuah Brazilian chu thiamloah puhin, hremna erawh a tuartu lam ukilte duhdan anga kum kaw tan em chu an ti ta lo a ni.
Audiencia Provincial de Barcelona (court) thuchhuahin a tarlan danin Alves sawi anga a tuartu phalna nena sex hmang an nihlohna court-in a nemnghet a, pawngsual a thleng ngei tih thuhretu hrang hrang atangin a chiang tih an sawi.
Alves-a ukil chuan court thuremna a khinlet (appeal) ngei tur thu sawi chungin lung in tan aia pawisa chawia hremna kalpui tura a beih chhunzawm tur thu a sawi.
Pawngsual tawktu ukil David Saenz ve thung chuan courthouse pawna court thuremna ngaichangtu chanchinbumite hnenah thubuai ngaihtuah a nih chhung zawnga an dinna pawmsak a nih chungchangah an lungawi tih sawiin, pawngsual tawktuin thudik a sawi a, a tuar ngei a ni tih court-in a pawmpui leh nemnghet ta chu a lungawithlak hle niin a sawi.
He case hi Spain rama footballer langsar ni thin Alves-a case a nihna piahlamah he rama hmeichhia – mipa nihna zawna tharum thawhna (gender violence) hluar chho zel avangin Spain-ah chuan topic lian tak a ni chho mek a, hei vang hian case ngaihven hlawh tak a ni.
Pawngsual thlen huna an sawi hi kum 2022 December ni 31 zan tlai tawh tak kha niin, hmeichhe lam ukilte sawi dan chuan Alves leh a thian pakhat chuan kha mi zan khan hmeichhe la naupang tak tak pathumte tan Barcelona khaw nightclub pakhatah champagne an lei a, an zinga pakhat chu Alves hian nightclub VIP area chhunga toilet-ah thlemlutin, a hmeichhiain chhuahtir tura a ngen lawm lawm chungin tharum hmanga pawngsual a thleng zui ta a ni.
Tarlan tawh thin angin, Alves hian a tirah amah puhtu chu a hre ngai lo niin a sawi a, a hnuah toilet-ah inhmu ngei mah se thil thleng engmah a awm loh thu a sawi leh a, a dinna hnuhnung ber erawh an pahnih remtihna thlapa sex hmang an nih thu a sawi.
Alves chuan hlim takin hun an hmangdun a, duh se la chuan toilet kha a chhuahsan thei reng tih court a hrilh.
An sawi zel danin, Alves khan amah puhtu chu manbetin, toilet chhuatah a namtlu a, chelhbet chungin a pawngsual zui ta ngawng ngawng mai a, hmeichhia chuan a duh loh thu sawiin, kaltir turin a ngen nasa a, mahse, chu chu ngaihthlaksak a ni lo.
Pawngsual tawka insawi kum 23 mi sawi danin, pawngsual a tawh hnu khan rilru leh taksa lamah natna leh harsatna lian tak a tawk zui a, hlauhnain a khat bawk a; trial kalpui a nih laiin pawngsual thlen zana awm ve pawngsual tawktu thiannu chuan toilet atanga an thiannu lo chhuak chu thlem ngaihna awm lo khawpin a tap nasa tih a sawi ve bawk.
Alves-a nupui ni thin, kum 31 mi Joana Sanz chuan pawngsual thlen zan nia an sawiah khan a pasal hlui chu rui tak chungin a lo haw a, inchhung bungrua pawh a paltlu rem rum a, khumah bawk thlawpin a chatthla zui ta niin a sawi.
Court thung chuan zuin Alves-a nungchang leh khawsak danah nghawng a neih a pawm lo thung. Chumi awmzia chu ‘a rui em a, a thiltih a hrechiang lo a ni’ han tih ang chu court rorelnaah chhuanlam a tling lo a ni.
Alves hian Barcelona tan khan game 400 chuang khel tlingin, league title paruk leh Champions League trophy pathum a lakpui bakah 2022 World Cup champion Brazil squad-ah a tel bawk.
Brazil tan game 126 khela he rama tana inlan hnemberte zinga mi niin, a club career-ah Sevilla, Juventus leh PSG tan trophy engemawzat a hlawhchhuak bawk.
Pawngsual thubuai a awrh hnu khan a club vawn hnuhnungber Mexican club Pumas UNAM chuan a contract an titawp zui ta a ni.