Kum riat hnua Delhi-a R-Day lum ni ber tawng

Pathiannia Republic Day lawmna pui ber, Delhi-a hman kha kum riat chhunga Republic Day a lum ber tum niin 23.7°C a ni phak a, a nih dan thin pangngaia aia 2°C-a lum niin India Meteorological Department (IMD) chuan a sawi.
Ram khawpui ber hi kum 2017-a Republic Day lawm tum khan 26.1°C a ni a, hemi hnuah kumin hi a lum leh ber tum a ni.
Republic Day lawm nia Delhi vawh dan hi kum tin a inthlak nasa hle a. Kum 1991 khan a lum lai berin 22.1°C a ni a, hemi hnu hian a vawt hret hret zawngin a kal a, nikum khan 20.6°C niin 2023 khan 17.3°C niin 2022 phei kha chuan 16.4°C a ni.
IMD chuan kumina a lum hret chhan hi van a thiang a, hmarthlang thli a ro vang niin an sawi.
“Tun hnaiah khawthlang atanga thli lo kalin India hmarthlangah ruah leh vur tlem rawn thlen mah se chhun lamah khua a that thin avangin Delhi-a khaw vawh lam hi a nghawng vak lo,” tiin Mahesh Palawat, Vice President, Skymet chuan a sawi.
Hetih mek lai hian chhun khawthiang leh hmarthlang thli hian zan lamah khua a tivawt zual hle niin a sawi.
Pathiannia Delhi-a a vawh lai ber chu 7.2°C a ni a, a hma ni khan 8.6°C niin Zirtawpni khan 9.8°C a ni bawk.
Thawhlehni atang hian khawthlang thli a thawh leh tan rin a ni a, hei hian a vawh lai ber leh lum lai ber a tihsan hret beisei a ni.
Hetih lai hian Delhi-a Air Quality Index (AQI) chu Inrinnia ‘a awm theih’ (174) atangin Pathianni khan ‘chhia’ (216)-ah a kai leh.
Early Warning System (EWS) chuan Thawhlehni thleng hian AQI hi ‘chhia’ huangah a awm an ring a, Nilaini atang phei chuan ‘chhu lutuk’ huangah a kai an ring.