Kum ruk hnua German Cup semi lut ve hram Bayern!

Kum ruk hnua German Cup semi lut ve hram Bayern!
Nilaini DFB Pokal quarter-final match-ah mualneitu Bayern Munich chuan si hnih faia an mikhual RB Leipzig hneh chungin kum ruk chhunga a vawi khatna atan German Cup semi-final an lut.
Inkhel en taima German fans 75,000 zetin Allianz Arena inkhel kha stadium chhunga lutin an thlir a, first half chhungin goal lawm tur erawh an nei zo lo!
Second half tir lam minute 64-ah Bayern goal hmasa zawk hmuh tur a awm zui ta tho a, England captain Harry Kane chuan penalty spot atangin German Cup-a a goal rukna a chhuihlut a, Bavarians tan tun season match 34 khelha a goal 39-na a ni hem tawh bawk!
Leipzig laka a goal thun leh hmangin Kane hi Europe league lian zual pangate zinga goal thun hnem ber a ni hman zet a, minute thum hnu leka an goal hnihna thawhtu Liverpool winger hlui Luis Diaz chuan a rawn lehpel zui leh nghal a ni.
England team captain hian tun season-a Leipzig a hmachhawn tawhah hat-trick a lo siam tawhte nen he club lakah hian goal nga lai a tilut tling ta.
Allianz Arena inkhelah khan minute thum chhung lekin mualneitu team lam khan goal hnih thun zawn thawt bawk mah se an goal khatna khung tur khan darkar khat chuang rim takin an thawk a; si hnih faia hma an hruai hnuah pawh mikhual hloh tur chuang nei lem lo Leipzig lam khan mualneitute an awm hle hle tir duh lo!
|an atanga minute lina lekah Leipzig lamin goal hmahruai thunah an inngai hman a, mahse, Christoph Baumgartner-a goal kha video assistant referee (VAR)-in offside tiin a hnawlsak hlauh.
Bayern lam pawhin goal an khung teuh nghal ve tho a, Leipzig player Castello Lukeba chuan line atangin Kane-a shot a hnawlchhuak thei hram a; mikhual goal-veng Maarten Vandevoordt pawhin save tha tak neiin, Ridle Baku pawhin hmun himah Joshua Kimmich-a corner chhuih a thawnchhuak ve bawk.
Bundesliga champion leh league hmahruaitu ni kal leh mek Munich hian a nawr chu an nawr ngang mai a, Vandevoordt chuan Aleksandar Pavlovic, Kane leh Serge Gnabry-te goal tur pui takin a dansak.
Tarlan tak angin, minute 64 leh 67-ah Bayern lam hian goal hnih an khung ta nge nge a, Vandevoordt-a’n Josip Stanisic a tihtluk vanga a penalty chu Kane-a’n goal-ah chantirin, tuibur hmuam da pawh tling loah Colombian Diaz chuan Willi Orban bumin season kal laia a goal 19-na chu Michael Olise ball pass atangin a khung zui ve leh bawk.