Kum thara Red Bull car khalh leh tur Verstappen

Kum thara Red Bull car khalh leh tur Verstappen
Kuminah Mercedes car khan loin Red Bull an talbuai a, an driver chhuantawlawl four-time world champion Max Verstappen meuh pawhin Grand Prix-ah chak a harsat ta tlat a, drivers’ championship lamah pawh pathumna daih niin, hmahruaitu Oscar Piastri nena an inthlauhna pawh point 81 lai a nih tawh avangin season tharah hian a chhuak mai ang em tih zawhna a piang hman hial tawh a, mahse, Dutch driver hian kum tharah pawh Red Bull tana race a la hmachhawn zui zel tur thu a sawi chiang.
Pathianni hian Hungaroring tlankawngah Hungarian Grand Prix thlir tur a awm leh dawn a, chu mi behchhana media a hmachhawn tumin Verstappen hian a hmalam huna mite zawhna neih chu a chhang fel a, kum 2028 thlenga contract a la neihna Red Bull-ah kum thar hian a la cham zui zel dawn tih a sawi.
Defending champion Verstappen chuan, “Season thara ka awmna tur chungchang hi ka sawi ngai lo hrim hrim a, a chhan pawh ka team vawn mekah bak rilru pekna dang ka nei lo a, engtin nge tun aia kan chetthat theih zawk ang tih bak helhkham pawh ka nei lo a, kum thara kan hmasawnna tur lamah rilru ka pe a, chuvangin, thil dang reng rengin ka rilru a luah lo.
“Tunah chuan rumour hi tawp tawh se ka duh a, ka tan chuan ka kawng zawh lai hi a chiang a; team thlirnaah chuan tunge car khalh ang tih zawhna hi chu piang tur ve reng a ni a, chu erawh ka hrethiam,” a ti.
Verstappen-a’n a dinna a sawi chian tak avangin season tharah hian Dutch driver beiseitu nia sawi Mercedes chuan George Russell leh Kimi Antonelli-te bawk an rawih chhunzawm leh a ngai dawn niin a lang.
Red Bull-a Verstappen-a cham zui zel ringtu Russell hian contract thar ziak tura a hmanhmawh loh thu a sawi ve bawk.