Kum za chuang chhung Wimbledon final-ainsawpna lian ber thlentu Swiatek
Kum za chuang chhung Wimbledon final-a
insawpna lian ber thlentu Swiatek
Polish player zinga Wimbledon singles title la hmasaber ni ta Iga Swiatek chuan a thlen san tak tak theih lohna mual ni reng thin grass-court ngei maiah Inrinni zan khan minute 57 lek chhungin final-a a khingpuinu Amanda Anisimova lakah 6-0, 6-0 hnehna a sual chhuak riap mai a; 13th seed American kha Wimbledon final kum 100 chuang chhunga game khat mah la loa tlawm hmasaber a ni!
French Open title ngawt pawh vawi li ngawt hawn tawh chunga tunhma zawnga Wimbledon quarter-final la pel ngai lo eighth seed Pole kha 1988 French Open final-a Natasha Zvereva sawptu Steffi Graf hnu lam Grand Slam final hrim hrima game zawng zawng la fai vek chunga champion leh thei hmasaber a ni.
A Grand Slam title paruk sualchhuahna kawngah kum 24-a upa Swiatek khan Centre Court-ah tennis zirna a hawng hi a ni hawt a!
Semi-final match-a Belinda Bencic a paltlangna kawngah pawh khan game hnih chiah a hloh a, final-ah khawng lehzual zawkin a inlan zui leh ta a ni.
Tun kha Grand Slam final vawi ruk a khelha vawi ruk a chakna niin, major tournament match 120 a khelh tawha vawi 100 a chakna chiah a nih rualin Serena Williams hnu lama grand slam match 100 chak tling rang ber a ni nghal bawk.
Poland chhuanvawr tan tun kha thla 13 kaltaa Roland Garros hnehna a chan hnua a trophy lak leh hmasakber a nih rualin kum 2002 champion Serena hnu lama khelhna leilung pathuma Grand Slam title la thei naupang ber a ni nghal.
Claycourt lama a theihna sang tak kha tualzawl phul hnim cham duai chunga chhawm zel a harsat tlat thin avangin kumin Wimbledon tan hma pawh khan champion tura beisei san viau a ngamawm loh a, chu mi chungchang chu amah, Swiatek pawhin hnehna a chan hnuah sawichhuakin:
“Hei hi chu ka beisei phak loh a ni a, a chhan pawh ka tan chuan hla lutukah ka ngai a, tawnhriat nei tam ve tawh player ni tho mah ila he hnehna kher hi chu mang lamah pawh ka man phak loh a ni,” a ti ve thlawt!
French Open hnuhnung vawi ruka Suzanne Lenglen Cup pali ngawt chawi thei world number four Swiatek hi ‘Queen of Clay’ an tih ve ngat kha niin, hardcourt lamah pawh kum 2022 khan U.S. Open title a lo hlawhchhuak tawh a, tunah Wimbledon grasscourt hnehna tluantling chang zui lehin, a hmabak awmchhun chu Autralian Open chiah a ni ta…