Kumar-a bawk chief minister kan nihtir leh dawn – Shah

Kumar-a bawk chief minister kan nihtir leh dawn – Shah
Union Home Minister Amit Shah chuan Bihar inthlan lo awm turah an kaihhruai National Democratic Alliance (NDA)-in hnehna an chang leh a nih chuan chief minister tur chu a chiang sa tih a sawi a, Nitish Kumar a ni leh ngei dawn tih a sawi.
Shah-a hian Chief Minister Kumar-a chu an ringtawk a, a kaihhruaina hnuaia inthlan hmachhawn chu NDA-in an huphurh lo va, an ring tih a sawi.
“Bihar chief minister tur tan hmun ruak dang a awm lo va, engmah inhnialna pawh a awm lo. Inthlan hi Nitish Kumar-a kaihhruaina hnuaiah kan hmachhawn tih ka lo sawi tawh ang kha a la ni reng,” tiin Shah hian Nilaini zana Network18 Group Editor-in-Chief Rahul Joshi-a’n News18 ‘Sabse Bada Dangal’ a buatsaihah a sawi a ni.
NDA-in hnehna an chana chief minister tur chungchang zawhnaah Shah-a hian eptu tangrual, Mahagathbandhan chhungkuaah ‘lal inchuhna’ a awm tih a sawi a. RJD chief Lalu Prasad Yadav-a’n a fapa, Tejashwi Yadav chu Bihar chief minister nihtir a duh a, Congress hruaitu Sonia Gandhi-in a fapa, Rahul Gandhi chu prime minister atan a duh ve bawk niin a sawi.
“Pu Lalu-a hian a fapa hi chief minister nihtir ngei a duh a, Pi Sonia-i’n a fapa hi prime minister atan a duh ve bawk a. An pahnih hian ka hrilh duh chu, Bihar emaw, Delhi-ah emaw an tan hmun a awm lo tih hi a ni,” a ti a. “Delhi-ah Pu Modi-a a awm a, Bihar-ah Pu Nitish Kumar-a a awm bawk,” tiin inthlan chu Kumar-a kaihhruaina hnuaiah inringtawk takin an hmachhawn tih a sawi a ni.
Bihar chu kum 11 liam ta chhungin ‘khawlpui pahnih’ hmang sorkar, Prime Minister Modi leh Kumar-a hmangin nasa takin hma a sawn tih a sawi bawk.
“Kum 11 chhung khan mi maktaduai 85.2-in a thlawnin chaw kg nga an dawng ziah a, Jan Dhan Yojana hnuaiah account vaibelchhe 6.60 hawn a ni a. Nitish Kumar-a hian a sorkar hmangin Bihar hi ‘ramhnuai sorkar’ atangin kum 11 chhung khan a chhanchhuak a ni,” a ti.
Union home minister-in hetianga NDA-in chief minister atana an zawrh a sawi chhuah hma ni lawkah hian eptu hruaitu, Tejashwi Yadav-a chuan Kumar-a hi nasa taka beiin rorel lai tangrualin ‘an duh duha an kaih kawi theih’ mai a nih thu leh BJP chuan thuneihna an chang leh a nih pawhin chief minister nihtir an tum tawh lo niin a sawi a ni.
Yadav-a hi BJP chuan chhang let zuiin ‘a in enkawl tha hmasa rawh se’ an ti let a. Hei hi a kaihhruai eptu tangruala neuh neuh awm anga sawi awm thin ching fel tura an tihna a ni.
“Nitish Kumar-a hi chief minister thin, ni mek leh la ni leh tur a ni a. Tejashwi-a hian a in enkawl tha hmasa se a tha zawk ang,” tiin BJP MP Ravi Shankar Prasad-a chuan Thawhlehnia eptu tangrualin an manifesto, ‘Bihar Ka Tejashwi Pran’ an tlangzarh tuma a sawi chu a chhang a ni.
Bihar Deputy Chief Minister Samrat Choudhary-a pawhin Kumar-a chu chief minister leh tur a nih thu a sawi ve bawk a, Bihar mipuite chuan ‘dan bawhchhe chhungkua’ nge JD(U) hruaitu anga ‘thianghlim’ chu an hruaitu atan an duh zawk tih a chiang tih a sawi.
Bihar assembly inthlan hun hi a hnai tawh hle a, campaugn beihpui thlak vanglai niin tawngkam pawh an duhtui lo sawt hle a. A thawh khat nan November 6-ah mipuiin vote an thlak ang a, November 11-ah thawh hnihna vote thlak a ni ang a. November 14-ah vote tlate hi chhiar zui a ni dawn a ni.