Kumar-a’n assembly thiat turin governor ti

Kumar-a’n assembly thiat turin governor ti
Bihar Chief Minister Nitish Kumar-a chuan Thawhtanni khan Governor Arif Mohammed Khan-a hmuin state assembly chu Nilaini atanga thiat turin a ti.
Nilainiah hian Kumar-a hian governor hnenah a bânna a thehlut ang a, NDA-a tangrualten sorkar siam turin an thlawp tih a hrilh nghal ang a. Ninganiah sorkar thar lak luh zui a ni ang.
Thawhtanni vek khan chawhmaah Kumar-a hian sorkar kal meka cabinet meeting hnuhnung ber a ko va, “Cabinet-in chief minister hi assembly ding mek chu thiat tura governor hnena thlen turin an ti a. Cabinet hian chief minister hi a hna a thawhnaah lawm thu an hrilh bawk,” tiin a lamhnai tak pakhat chuan a sawi.
NDA atanga hriat chinah chief minister lak luh rual hian minister 20 vel lak luh an ni nghal dawn a. Heng zinga paruk/pasarih chu BJP leh JD (U) atangin a ni ang a, LJP (RV) atangin pahnih leh Hindustani Awam Morcha (Secular) leh Rashtriya Lok Morcha (RLM) atangin pakhat ve ve an ni ang.
Union Minister Jitan Ram Manjhi-a fapa, HAM (S) hruaitu, Santosh Kumar Suman leh RLM chief Upendra Kushwaha nupui, Snehlata te chu minister-a lak luh tur zingah hian an tel nia sawi a ni bawk.
JD (U) leh BJP bik hi Thawhlehni khan an thukhawm leh bawk a. Nilainiah hian NDA-a telte chuan an hruaitu tur an thlang dawn a. “NDA chhungah hian Nitish Kumar-a kaihhruaia la awm leh chu lungrual taka la duh tlan a ni a. Tih dan thin angin NDA hruaitu atan thlan a ni ve hrim hrim dawn a ni,” tiin tangrual hruaitu pakhat chuan a sawi.
Hetih lai hian RJD MLA atana thlan tharte chu Thawhtanni khan Tejashwi Prasad Yadav-a kaihhruaiin Patna-ah an thukhawm ve bawk a. Tejashwi-a hi RJD legislature party leader atan thlan a ni a, assembly thar din turah Leader of Opposition (LoP) a ni dawn tihna a ni.
RJD supremo Lalu Prasad chuan Tejashwi-a hi LoP atan a duh a. RJD hruaitu hian, “Inthlanah che tha tawk lo hle mah ila MLA zawng zawngte chu Tejashwi-a hruainaah hian kan la lungrual a ni,” a ti.