Kumin Copa del Rey final-ah El Clasico kan hmu dawn!

Kumin Copa del Rey final-ah
El Clasico kan hmu dawn!
Thawhlehni khan Copa del Rey semi-final second leg hmasa zawk extra time-ah 4-4-in mualneitu Real Madrid leh Real Sociedad an inhnehtawk a, vawihnih khelh belhkhawmah 5-4-a chakin Bernabeu club-in final an lut a, Nilaini zana 5-4 bawka Atlatico Madrid hnehtu Barcelona nen final-ah an intum dawn a, kumin Spanish Cup final-ah El Clasico kan hmu dawn.
Atletico Madrid 0-1 Barcelona
Belhkhawmah Barcelona 5-4-in an chak
He semi-final thawhnihna hi Arab ram lama khelh niin, Riyadh Air Metropolitano stadium-a mipui 69,014 zet pungkhawm hmaah goal khat chiah a lut a, he goal awmchhun leh sikhat faia Barca chakna goal awmchhun ni nghal hi first half minute 27-a Ferran Torres thun niin, Spain international Lamine Yamal-a siamsak a ni.
Torres hian Catalan team tana a game khelh hnuhnung vawiliah goal nga tehreng a khung tling ta a, an star thar Yamal meuh pawh a hliah titih deuh der mai!
Kumin February thla first-leg ang lo takin Nilaini zanah Diego Simeone-a team-in goal thun an harsat tluanchhuak a; first leg-ah kha chuan hun tawp lama goal hnih thunin 4-4 draw pui tak kha Catalan team lakah an hlawhchhuak thei a, second leg-ah erawh goal an khung zo ta lo a ni.
Inkhel pumpui thlirin Atletico khan Hansi Flick-a team kha hun rei zawk chu an khan lo ngei a, Spanish Cup trophy la hnem ber nia vaw 31 champion tawh Barca chu inelna hrang hranga an game khelh hnuhnung vawi 21-ah an tlawm lo tling ta hial a ni.
Catalan club hi Europe league lian zual pangate zinga kumin chhung bika la tlawm lo awmchhun niin, tun thleng hian title pali la thei dinhmunah an la ding chhunzawm zel a ni.
Tun season-ah hian Spanish Super Cup an la fel tawh a, La Liga table lamah hma an hruai chhunzawm zel a, anmahni hnaihbertu Real Madrid lakah point thumin an sang mek a; April ni 9 mai hian Champions League quarter-final first leg-ah Borussia Dortmund an mikhual ang.