Kumina thisen pek zinga a thlawna pek zaah 94.19

Kumina thisen pek zinga a thlawna pek zaah 94.19
Thla ruk kalta chhung khan Mizoramah a mamawhtute hman turin thisen unit 18643 pek a ni a, heng zinga zaa 94.19 chu a thlawna pek a ni.
Zirtawpni khan Association for Voluntary Blood Donation (AVBD) chu an patron, Health minister Lalrinpuii hoin an thukhawm a. 2024- 2025 kum chanve chunga a thlawna thisen pek dinhmun an thlirlet.
Sawrkar kum kal mek, April – September chhungin Mizorama Blood Centre 11-a thisen pek zawng zawng chu unit 18643 a ni a, hemi atanga a thlawna pek chu unit 17559 niin, chu chu thisen pek zawng zawng atanga chhutin zaa 94.19 a ni. Kumin kum chanve chhunga a thlawn thisen pek hi thla 6 chhung anga tehin Mizoramin a thlawna thisen pek percentage a neih that ber tum a ni tih a sawi a ni
Health minister chuan tlawmngaia thisen petute chungah lawmthu sawiin, AVBD hmalakna chhuanawm a tih thu a sawi a. India ram state zingah Mizoram-in a chhe zawnga pakhatna nihna a hauh nual laiin, midangte nun chhanna thisen pek kawngah ram puma titha ber nih a beisei tih sawiin, chu dinhmun chu nih tum turin AVBD member-te a fuih a ni.
AVBD hian a thlawna thisen pek kawnga hmasawnna tur a ruahman a. Kumin December thla chhung hian Krismas pual thisen pek runpui buatsaih an tum a, Mizo thalaite Krismas puala thisen pe turin a ngen ti a sawi a ni.