Kuminah heroin man belh zel

Heroin a hluar a, a mantu lam pawhin an man hnem tawh. Excise force te’n kuminah an man teuh tawh a, an la man belh zel bawk.
October thla thleng khan Mizoram Excise & Narcotics (MEN) department-in heroin hi kg 39.018 an man tawh a, a tam tham hle.
An chhinchhiahna enin, 2022-ah khan kum tluanin kg 33.418 an man a, chu aia tam chu kuminah thla 10 chhungin an man tawh. Kumin hian September thla thleng khan kg 37.075 an man a, 2022 kum tluana an man aiin kumin thla kaw chhunga an man hi a tam zawk.
2023-ah khan kum tluanin kg 79.359 an man a, hei hi an man tam ber kum a ni.
Heroin hi a hluar a, a hluarzia hi khawlaiah pawh a lang. Aizawlah chuan kawngpuiah leh hmun lun laiah te a zuar leh a ti thinte langsar takin an awm a, chhun pachanga khawlaia inchiu mawlh mawlh pawh hmuh tur an awm thin.
Heroin hi a hlawma zuar ni lote chuan khawlaiah an zuar mai a, ‘vawrh’ tiin an sawi thin. A rui thinte zingah pawh ‘vawrh’ nghal hi an awm.
Aizawl khawlaiah zalen takin heroin hi an zuar thei niin a lang a, zing lamah leh zan lamah lei hi a rem ber a, chhun lamah chuan an tawm ve deuh tih thu dawn a ni.
Heroin man hi a che reng a, a hluar viau na a, a man hi a tlawm vak chuang lo nia hriat a ni. Nikum lam aiin a man hi kuminah a to zawk nia ngaih a ni.