Kuminah lian takin bana kaih policy kan kalpui thei dawn lo – Chief minister

Leiba rulh ngai an la ngah avang leh inpuahchah hun atana an lo puan bawk angin, kuminah chuan Bana Kaih Policy chu liantham takin an kalpui thei dawn lo tih chief minister Lalduhoma chuan a sawi.
Mizoram State Policy Coordination Committee chu an chairman, chief minister ho hian Thawhlehni khan an thukhawm a. Loan based progress partners, Zau Policy leh line department-te inkaihhruaina lam an sawi. Leiba chinfel ngai a tam avangin an policy kalpui nghal vut vut theih a ni loa, leiba an rul chho zel a, hma pawh an sawn hle tih chief minister hian a sawi.
“Kumin hi inpuahchah kumah kan puang bawk a. Chuvangin kumin bikah hand holding policy hi lian takin kan kalpui thei dawn lo. Kan sum dinhmun that dan azirin hmalakna kan nei lian chho zel dawn. Chutihlaiin thlai thar lei tur pali kan thlan tawh erawh kan lei ngei ngei dawn,” a ti.
Member secretary Lalmalsawma Pachuau chuan policy inkaihhruaina duan tlangpui leh sawrkar kum kal meka budget, hand holding sum dah hman dan tura duan a sawifiah a, sawiho zui a ni.
Thu ngaihtuah langsar zingah, loan hmanga ‘hand holding’ kalpui turah Credit Guarantee Fund Scheme for MSME hmanga 100% loan guarantee – progress partners pek theih dan leh buaipui mek a nih dan, PMEGP, KCC leh loan danga interest subvention pek theih tur zat, progress partners thlante tana training dan tur, monitoring kalpui dan tur leh official-a Hand Holding Policy khuhhawn hmaa tih tur tul awm theite an ni.
Hei bakah hian Zau Policy kalpui dan tur ruahmanna leh Hand Holding Policy line department-te inbuatsaihna tur thil pawimawh pawh an sawi a ni.