Kuminah ruah vawi hnih sur ta

Kuminah ruah a tlem a, a sur har bakah a sur chhunah pawh a tlem. Thla thum chuang a ni tawh a, ruah hi tih tham a la sur lo.
State Meteorological Centre-in an chhinchhiah danin, kuminah March ni 18-ah ruah a sur a, hei hi kumina ruah hmasa ber a ni. Hemi tum hian teh tham ngawr ngawr chauh a tla a, mm 1.8 chauh a ni. April ni 7 tukah a sur leh a, mm 10.2 a ni. April ni 7 thlengin kuminah heng ni hnihah chauh hian ruah a sur.
An chhinchhiahnaa a lan danin, nikum khan March thla thlenga ruah tui tla zat chu mm 50.8 a ni a, 2023-ah March thla thlenga ruah tui tla zat chu mm 78 a ni. Kuminah chuan March thla thlenga tla zat hi 1.8 chauh a ni.
2024-ah January leh February-ah a sur a, 2023-ah chuan January leh February-ah a sur lo. March ni 16-ah ruah hmasa ber a sur chauh a, mahse March thlaah hian ruah tui hi baw tlawrh tlawrh khawpa tam a sur thung.
Mizoramah chuan ruah hi thla tin a sur thin tiin a sawi theih a, thla tina a sur loh kum a awm chang a awm a ni chauh. 2023-ah khan ruah a sur har a, hei vang hian March velah khua a lum bakah a uap. Kumin pawh hian March velah khua a lum a, mahse ruah sur loh rei tawh dan ngaihtuahin rin aiin khua hi a lum lutuk lo zawk. State Meteorological Centre lam chuan hei hi thlasik a rei vangah an ngai a, thlasik liam ta kha vawt vin vur ni lo mah se a rei an ti.
State Meteorological Centre lam chuan tun kar hi ruah sur tura beisei a nih thu an sawi a, Mizoram hmun thenkhatah a sur a rinawm tih chu India Meteorological Department thlir dan a nih thu an sawi.