Kumthar ‘relationship resolution’ siam rawh le

December thla chanve kan kai leh ta a, damtein kan awm ang a kum thar kan chuangkai leh mai dawn e. Kum lo thar tur ang bawkin nupa inkar pawh a thara bul tan lehna hun remchang a ni a, hun kal tawh te theihnghilhin boruak thar thar nen kum bul atanga hma thar la turin inpuahchah rawh le. Kum a thar ang bawka rilru thar nen, nupa hlim taka awm theihna kawng tha ni a relationship lama mithiam te sawi kan rawn tarlang e:
1. Nupaa hun hman dun tam tum rawh u. In khatah cheng mah ula engtiang chiahin nge hun in hman dun thin le? In hun tam zawk chu thutthlengah thuin TV in en a. ‘Quality time’ eng ang chiahin nge in hman le. Nupaa titi a, inkawm melh melh te in nei meuh lo a ni lo maw.
Kum tharah chuan nupaa ‘quality time’ hmang tam thei turin inbuatsaih rawh le. Zantin darkar chanve tal nupaa inkawmna hun te neih theih tum la, chu chuan in nupa inkar a tinghet sawt ang.
2. Nupa inhriatthiam tawn tumna kan neih loh thin avangin inhauhna a thleng thin. Kumtharah chuan chutiang chu thlen tir tawh suh. Chhungkuaa harsatna awm te sawi dunin, a pakhat zawk chauhin siamthat tuma hma la lovin, nupaa chet dun a, inremsiam thiam a tha hle a ni. Engkimah a thiam zawk leh dik zawk nih tum kher a tul lo, chutiang kan tumna chuan nupa inkar boruak a tichhe thin tih hrereng ang che.
3. Nupa inhriatthiam tawnna hi harsatna sukiangtu a ni thin. Eng boruak pawh tawng ula, i rinthuin ngaihdan lo siam ngawt lo la, chu ai chuan i rilru-a i vei leh ngaihtuah te chu inhawng taka sawi dun thin zawk tur a ni. Nupa inpawh tak te chu an hlim zawk nge nge thin. Sawi tur i neih chu sawi mai la, hun tha nghakin, sawi hun tur khek kher suh- i tlai palh ang e. Engmah i sawi loh chuan i kawppui chu i rilrua i vei leh i awmdan te hrethiam turin beisei ngawt suh. Chuvangin, kumtharah chuanb i kawppui nen inpawh taka awm theih tum ang che.
4. Eng emaw chen in awmdun tawh hnu chuan in hlim dun theih thin zia te kha i theihnghilh a, nun chu ninawm riaua hriatna te pawh i nei thin. Ngaihpawimawh zawngte a lo inthlak a, inhlim dun ta lo riau ni te pawhin i hre thin ang. Mahse, kumtharah chuan boruak thlak rawh le. In nupa hlimna chu ngaihpawimawh berah nei rawh. Nupaa len khawthawn te, khawiah emaw zanriah han ei dun te, TV leh computer hmaa thut reng aia park-a han teihawi dun nen te i hun hmang tawh zawk rawh le. A pawimawh ber chu inchhung sekrek khawiha buai em em awm reng ringawt lova, nupaa intihhlim lam a ni