Kumtharah grade sawi loin hmunphiah kan lei tawh ang: – Agriculture minister

Kumthar atang chuan sawrkarin hmunphiah bik chu a grade siam loin an lei tawp tawh dawn tih Mizoram Agriculture Marketing Board chairman, Agriculture minister PC Vanlalruata chuan a sawi.
Thawhtannia ZPM party office-a thu a sawinaaah Agriculture & Farmers Welfare minister chuan, hmunphiah chu empanelled firm-ten sawrkar rate anga lei turin an intiam a, an intiam anga an kal leh loh avangin an bul tanna a fuh lo deuh a, chuti chung chuan ZOHANDCO kaltlangin kumin March chhung khan sawrkarin kg. 249828 a lei tih a sawi.
“Kum a lo thar anga, hmunphiah ro chu grade sawi loin sawrkarin a lei dawn,” a ti.
Sawrkarin direct-a sawhthing a lak zat chu quintal 94160 a ni a, support price a pek tawh zat qtl. 121740 a ni. Kumin June 21 thlenga sawhthing lak tawh zat chu qtl. 215900 a tling, tiin, sawhthing rate chhiat ber kumah pawh sawrkarin cheng vaibelchhe 85 chuang a seng tawh tih a sawi bawk.
ZPM sawrkar chuan sum leh pai tam tak sen a ngai dawn tih hre chungin thlai thar lei an buaipui tih sawiin, “Chief minister-in sum harsat zia leh sawhthing rate chhiat ber kum a ni tih hrereng chungin kuthnathawktute tihbeidawn a duh loa, a department changtu minister ka nihna ang pawhin ka lawm takzet a ni,” a ti.
Sawhthing bikah Siliguri pel loin Mizoten kan lo hralh nasa hle tih sawiin, “Bagha Vai kan pekte pawh hian Siliguri thleng an phur a, chuta tang chuan buyer lianten an lo la chhawng ve leh a ni. Kumin atang chuan phai buyer lianten Mizoram sawhthing an hre chho tan ve ta,” a ti.
Tung sawimawi leh a zahthlak deuh lek lek tawh chungin, India-in Tung hriak a mamawhna a sang a, phai lama rah tha thei lo hi Mizoram leilung a ngeih si a, lo neihna chul hmang tangkaiin Hmuntha khuaah Tung an phun khat vek tawh a, Tualpuiah tin 300 hmun velah an ching tan bawk tih Agriculture minister hian a sawi.
“Kan thlai thar a tam tham loh chuan a market-ah harsatna kan tawk thin a, thlai emaw thei lam emaw pawh ni se bawh bik kan neih a ngai. Sapthei-ah pawh hma kan la chho mek a, kan sapthei variety hi phai lam aiin hmun Zo lamah a tha duh a, grade A leh B thawnchhuah atan kan ti anga, grade C chu theitui siamna atan kan process dawn,” a ti bawk.