Kut themthiam thil inzirtirnaah LESDE leh KVI thawk dun dawn

Labour, Employment, Skill Development and Entrepreneurship Department leh Mizoram Khadi & Village Industries Board chuan Thawhlehni khan LESDE minister Lalnghinglova Hmar hriatpuina in thawhhona thuthlung an ziak.
LESDE aiawhin secretary Lalmalsawma Pachuau leh Mizoram KVIB aiawhin chief executive officer Saikungi ten thuthlungah hian hming an ziahhnan a. LESDE director Angela Zothanpuii, additional secretary K Lalhmingliana leh KVIB chairman C Lalremliana ten an hriatpui a ni.
Minister chuan Mizo thalaiten skill development an mamawh zia sawiin, hetiang thawhhona thuthlung an siam thei chu lawmawm a tih thu a sawi a. Thawhhona tha tak an neih theih nan theihtawp chhuah a ngai, tiin, thawhhona dang pawh a awm zel theih a beisei thu a sawi a ni.
Thawhhona thuthlungah hian skill development activity chi hrang hranga inpui tawn turin thu an tiam a. LESDE department-in sawrkar scheme leh programme chi hrang hrang a buaipui anga, KVIB hian KVI Training Centre leh thil dang hman theih turin a lo ruahman ang.