Kuthnathawh leh eizawnna tling…?

Kuthnathawh chu eizawnna tling a ni thei tih chiang mah ila, ram pum hmasawnna atan chuan hman ahanga tih phunga neih tawhte kalsan a hul thin, tiin chief minister chuan a sawi a. Sawrkarin engkim a vaihma vek tur ni loin, sawrkar chuan mimal emaw private firm-in amaha a tih theih loh hna liantham chu a thawh tur a ni, tiin a sawi bawk a.
Kuthnathawh han tih hian a huam zau hle a, Mizoten kan tinzawn deuh ber chu huan lo ram siama eizawnna, in lam leh ram lama hnathawh hi a ni awm e. Lo kan nei a, huan kan siam a, thlai leh thei kan ching a, kan thar chhuak a, kan zuar a, sumah kan chantir a, sum chu ei bar leh silhfen, chenna leh khawsakna atan kan hmang a, chutiang chuan kum tin hun kan hmang ral a, a tlachawpin kan nung reng mai tihna a ni. Hetianga khawsa mek hi kuthnathawk zingah tun thleng hian a tam zawk an la ni reng.
Hei hi Mizorama kuthnathawktu tam zawk dinhmun a la nih reng si chuan, kuthnathawh hlawhtlinpui lote hian enge tih dik loh an neih tak ang? Kuthnathawk zingah pawh hlawhtling an awm laia hlawhtling ve lo a tam zawk an la nih reng chuan, dik lo chu a awm chiang a ni.
Mizoramah hian mihring kan tam lo a, a ram zau zawng pawh zim te a ni. Chu chu bial 40-ah hhensawm a ni a, bial tinah mihring singkhat singnga ahanga singhnih bawr vel kan awm a. Bial tina mihring awm zat hi sawrkar term khat chhung lek pawha eizawnna hlawhtling nei tura siam vek theih awm tak a nih laiin, mahnia kan indan han, UT ahanga State kan nih hnuah, kum 50 a liam leh tawh a. Kum sawmnga chhung khan kuthnathawktu tam zawk chuan hlawhtlinpui lovin an thawk ngar ngar mai tihna a ni ber awm e.
‘Kuthnathawh hi eizawnna tling chu a ni teh meuh mai, chutih laiin kuthnathawktuten an thawk reng chung pawha a hlawhtlinpui lo a tam zawk an la nih reng si chuan, mipui dawmkang tura siam sawrkar hian a tih tur a ti tawk lo deuh a ni mai lo maw? tih hi zawhna a ni.