Kuthnathawktute hmakhua ngaiin wine siam hmachhawpah kan nei – Prof Lalnilawma

Kuthnathawktute hmakhaw ngaih vangin kan thei leh thlai tharte hlawk zawka hlutna tipung turin sawrkar chuan wine-a chantir theih chi ho wine-a siam a tum a, chumi tur chuan Assembly thutkhawmah pawh ‘wine rules’ putluh an tum tih Horticulture minister Prof Lalnilawma chuan a sawi. Zirtawpnia Mizoram Horticulture Service Association general conference neih a hmanpuinaah minister chuan, sawrkarin wine siam lam hmachhawpah a nei a, hei hi kuthnathawktute hmakhaw ngaih vang a ni tih a sawi. “Kan thei leh thlai tharte a market value tipung turin wine-a chantir a ngai a. Dah rei theih dan zawn a ngai. Kohhran lam atanga en chuan wine lam sawi awm lo ber ka ni chungin, kuthnathawktute hmakhua ngaihna avang zawkin ngaihtuahna sen a ngai,” a ti.
ZPM-in sawrkarna a chan hnua Union Rural Development minister, Agriculture & Farmers’ Welfare changtu ni bawk Shivraj Singh Chouhan an hmuhnaah, a chawrchhuahna Madhya Pradesh bikah Mizoram atanga siam wine hralh phalna pe turin an ngen tih RD minister ni bawk Prof Lalnilawma hian a sawi. “Wine siam kan sawi hian Mizoram chhunga zawrh tur kan thlir loa, state danga thawnchhuah tur zawk kan thlir. Kan farmer-ten hlawkna an tel dawn chuan heti zawnga rilru sen a ngai a ni,” a ti a. Tun Assembly Session-ah pawh wine rules hi putluh a ni dawn tih a sawi a ni.
Hei bakah hian Dragin fruit chu a ‘powder’ a siam turin sawrkar laipuiin phalna an sawi hmawrhmuh (green signal) tawh niin a sawi bawk.
Sawhthing chungchangah Reliance nen thawhdunna an siam a, an ni hian India ram hmun hrang hranga an ‘outlet’ ah an hralh sak thei dawn tih sawiin, chutiang a nih laia, tunhnaia an thawn hmasak zinga a chhia lo awm chu, a rilru nat thlak avangin amah pawh a duh aiin a tawng na deuh a, khatah khan tawp thei se a duh hle tih Prof Lalnilawma hian a sawi. Kuthnathawktute thawh rah seng tir ngei tuma sawrkarin theihtawpa hma a lak mek laiin, farmer zingah party politics la na deuh, sawrkar hmalakna tih thuanawp hreh lo an awm palh theih avangin Horticulture officer-te tan pawh kuthnathawktute tana thahnamngaia department-in hma a lak meknaah politics la na lutuk lo tura hrilh tel a ngai nia a hriat thu a sawi a ni.
Reliance Company nen hian thlai/thei panga – sawhthing, Mizo hmarchate, sapthei, dragon fruit leh lakhuihthei hralhchhuahnaah thawhdunna an siam tih Horticulture minister hian a sawi a ni.