Kuthnathawktute tan ZPM ding reng dawn – ZPM Thalai

Kuthnathawktute tan ZPM ding reng dawn
– ZPM Thalai
Sawhthing lei chungchangah kuthnathawktute duhthusam loh laina tam tak awm mah se, a chinfel dan kawng dap zel niin, ZPM party chu kuthnathawktute tan a dinna ngaiah a la ding reng tih ZPM Thalai chuan an sawi.
ZPM Thalai Hqrs. thuchhuak chuan, India ram state hrang hranga sawhthing rate enin, kumin hi Mizoramah sawrkar hmasate hunlaia thil thleng nise, sawhthing dah kumhlun kum tur ni ngeia a lan thu a sawi a. ZPM sawrkarin kuthnathawktute harsatna hria a sawhthing a lei mekah kuthnathawktute duhthusam an tlin lohna lai tam tak awm mah se, theihtawp chhuahin Agriculture minister Pu PC Vanlalruata hmalakna a chinfel dan kawng dap zel a ni a, April 21 atanga sawrkarin sawhthing a lei leh turah kuthnathawktute harsatna engemawchen a phuhruk turah an ngai tih a sawi a ni.
Tunhnaiah MPCC treasurer Dr Lalmalsawma’n Agriculture Marketing Board-in sawhthing a lei sa FCI kudam-a dahkhawm mek, tender zawh loh la bang awm chu kuthnathawktute sawhthing la hralh loh dahkhawm emaw tiin a tlawh nia sawiin, ‘NLUP heti taka an mualphopui chunga Congress-in an policy ti hlawhtling thin nia a sawi kha a tawngvai ta mai em ni, tih hi kan zawhna a ni,’ a ti.
Kan ram politics-a ‘sem policy’ tichhuaktu chu Congress party a ni tih ZPM Thalai hian sawiin, ‘Kum 1989- 1998 thleng, term hnih chhung NLUP-ah Rs 30000 sem an zuar a. Kum 10 chhungin chhungkaw 54932 hnenah RD Block 12-ah chauh an sem hman a, RD Block 9 – Bunghmun, Hnahthial, Darlawn, Lawngtlai, Chawngte, Sangau, Aibawk, Tuipang leh Phullen-ah cheng khatmah an sem hman lo. Kum 10 chhungin Mizorama chhungkaw zatve pawhin an dawng hman lo,’ a ti.
MPCC-in kum 2008-a sawrkarna a chan leh khan, kum 2012-a Synod Social Front-in NLUP zirchianna report an thehluhah, beneficiary zaa 29.4 chu anmahni duhthlan trade ni lo pek an ni a, beneficiary 88.6% chu Congress party an ni a, cheng nuai khat a kima dawng chu chhungkaw 7 chauh an ni tih a sawi bawk.
2017 March 21 Budget Session-ah khatih laia chief minister Pu Lal Thanhawla chuan, NLUP hi a hlawhtling lo a nih pawhin, an ni chu an hlawhtling a, an hlim em em tih a sawi thu leh; 2017 May 25 Session-a CAG Report pharhah NLUP thiltum pali – tlangram lo neih tihtawp, khamkhawp buh thar chhuah, Mizoram 80% ramngawa siam leh ram leilung hman dan tur duanfel tih chu pakhat mah a hlawhtling lo tih tarlan a nih bakah beneficiary 7942 an kawm zingah NLUP dawng ve thei lo tura ngaih chhungkaw 1400 in an dawng ve a,beneficiary 9% chauhin an hlawhtlinpui a, YMA-in baseline survey hmanga khaw 813 atanga beneficiary tur an thlan chu NLUP Apex Board-in a hnawl tihte a chuan thu a sawi.
‘Zoram kuthnathawktute hi sawrkar hmasaten an lo ti beidawng tawh thin a. Chemtum leh iptepui nen kawng hial an lo zawh tawh a. Chief minister Pu Lalduhoma leh Agricultur minister kaihhruai ZPM party erawh a policy kuthnathawktute tan a dinna ngaiah a la ding reng dawn tih kuthnathawtute kan chah a, thlamuang taka awm turin kan chah a ni,’ ZPM Thalai thuchhuah chuan a ti.