Kuthnathawktute thil siamsa lei theihna dawr hawng thar

Kuthnathawktuten intelkhawmten an thil siam hrang hrang zawrh chhuahsakna tur chu Cooperation department-in Aizawlah a siam thar a. Nilaini khan Cooperation minister PC Vanlalruata’n a hawng.
Pradhan Mantri Janjatia Vikas Mission (PMJVM), Van Dhan Mission tih bawk hi Mizoramah 2020 January 23 atangin Cooperation department-in a kalpui tan a, 2023 March 27 atang khan central sector scheme a ni tawh.
He scheme hnuaiah hian Van Dhan Vikas Kendra (VDVK) 259 din tawh niin, heng VDVK hnenah hian training bakah hmanrua leh chakkhai an mamawh angte a thlawnin pek an ni. Heng operational VDVK-te thil siam hrang hrang pho chhuah sak hi Cooperation department chuan a ngaipawimah a. Tunah a bul tan nan VDVK 32 thil siam hrang hrang lakhawmin, a pho chhuahna atan RCS office ground floor, Babutlang Zarkawt Aizawlah ‘Mizoram VDVK Outlet’ hi siam a ni.
Cooperation minister chuan an department hnuaia federation-te chu tunlai khawvel hmasawnna thang zel mila an kal leh an inherrem a pawimawh tih a sawi a. Khawvel khawi ramah pawh, federation leh cooperative society an changtlunna apiang chu ram nuam leh hmasawn chak ber ber an ni zel tih a sawi. Ramin hma a sawn tak tak theihna’n federation leh department-te thawhhona tha chu thil pawimawh ber pakhat a ni tih a sawi bawk.