KVK Kolasib ram chu thehsak tumna a awm ngei nia hriat a ni a. Ram hi chhuhsak an nih lohna’n MJA Kolasib chuan hma a la mek. Kolasib bawrhsap chuan sawrkar ram chu dan anga humhalh tlat a ni tih a sawi a ni.
MJA Kolasib District hruaitute chuan Thawhlehni khan district bawrhsap John LT Sanga an hmu a, tunhnaiah KVK Kolasib ram, mi thenkhatin neihsak tumin ‘survey peg’ an lo khen thu an sawi a. KVK ram chauh lo pawh Kolasib khawchhungah sawrkar department ram thenkhat chu mimal hnena theh tumna a awm nia an hriat thu leh dan tlawhchhan awm loa hetiang chetna thleng hriat tur awm leh thin chu tha lo an tih thu an sawi a ni.
Hemi nena inzawmna nei nia ngaih theih hian Kolasib bialtu MLA, minister K Lalrinliana July 12 atana ‘tour programme’ a siamah KVK Kolasib ram hi a tlawh dawn nia inziakin, ‘inhmun neilo ten inhmun an beiseina hmun KVK ram ka tlawh ang’ tih tarlan a ni. Ram hi mi engzat tan nge theh tum a nih hriat a ni loa, an peg khenna atang chuan mi 50 vel an tlin rin a ni tih thu dawn a ni.
Amah hmutu Kolasib MJA hruaitute hnenah bawrhsap chuan, Kolasib-ah sawrkar department, ram nei lo engemawzat an awm a, chu’ngte chuan office hmunhma an neih theihna’n hma a lak a tul tih a sawi. Chutih rualin mimalin sawrkar department ram reng reng, a neitu department phalna lo chuan luahsak emaw chhuhluih tum chu dan bawhchhiatna a ni, tiin, Bilkhawthlirah pawh chhungkaw hnih chuan Soil & WC department ram chhungah in an lo sak thu leh heng mite hi an in sak lai chawlhsan tura a hriattir thu a sawi.
“Department-in ram a luah sen loh vangin neihsak ngawt theih a ni loa, dan awmsa zawm chunga thil kalpui a ngai,” John LT Sanga hian a ti a. Sawrkar property reng reng, a ram neitute phalna loa luahsak theih a nih loh thu a sawi. KVK ram laksak tumna awm nia sawi pawh a hmunah SDC tirin a enfiah tir tawh a, ‘Government Protection Act’ tlawhchhanin sawrkar ramte humhalh a ni tih a sawi a ni.
KVK Kolasib ram thehsak tum Sawrkar ram hi humhalh a ni – DC
Get real time updates directly on you device, subscribe now.