La Liga champion Barca lawmpuitu Messi

Pathianni zan El Clasico hnehna an chan rualin FC Barcelona chuan an club chanchina a vawi 29-na atan Spanish La Liga title an hlawhchhuak leh ta a; he thawmah hian an legend Lionel Messi pawh a ngawi mai mai thei lo a, Instagram post siamin, a team hlui thlalak chungah ‘Campeones! Visca El Barca!’ tih a tarchhuak.
Argentina FIFA World Cup-winning captain Messi hian Major League Soccer club Inter Miami CF thuam inbel tawh mah se tuipui ral hla tak atang pawhin Ballon d’Or chawimawina tum riat ngawt a dawn laia a club behchhan lawmpui tur hian a kut a la zum lo kher mai!
Barcelona tana kum 20 dawn a khelh chhung khan Messi hian match 520-ah goal 474 thunsak tlingin, trophy 34 tehreng a lakpui hman a, chu’ng zingah chuan La Liga title 10, UEFA Champions League title pali leh Copa del Rey trophy pasarih a tel a; FIFA Club World Cup pathum, UEFA Super Cup pathum bawk leh Spanish Super Cup pasarih a la tel cheu bawk!
He Argentine legend tan hian Barcelona hi club hlui satliah a ni thei ngai lo ang.
Rawlthar tan tir, Argentine naupang zakzum leh pumraw lian lo tak kha Nou Camp club hian Rosario khawpui atangin an hruai chhuak a, footballer piang chhuak tawh zawng zawng zinga ropuiberte zinga pakhatah an chhuah ta a nih kha.
2003-04 season-ah Barcelona B team tan khelin, kum 16 a tlin meuh chuan FC Porto nen friendly match an khelh tumin second half minute 75-ah khelmual a lut a, Spanish club ropuiah a senior debut a nghakchhuak der mai a nih kha!
A hnu lama a career chhunzawm dan chu khawvel hian a hai lo khawp mai a, treble champion tum hnih ngawt a nihpui bakah a career kawi tina a record insaikalh nukte avang pawh hian Messi tan Catalan giants hi club hlui satliah a ni thei ngai lo ang.
El Clasico…
Pathianni zan Camp Nou La Liga inkhel lianah first half chhunga Marcus Rashford leh Ferran Torres-te goal khat ve ve tihluh hmangin mualneitu Barcelona chuan 2-0 hnehna nen point thum an thawk chhuak a, khelh thum la awmah an hnuai chiah luahtu Real Madrid tana um phak ngaihna awm tawh lo point 14-a hma an hruaifal tak avangin Hansi Flick-a team-in an title kawl lai an humhim.
Barcelona hmahruaina goal kha minute kuana leka free-kick hmanga Rashford-a chhuihluh niin, minute kua a liam leh tihah Dani Olmo ball pek fing tak atangin Torres chuan home team goal hnihna a thawh zui ve leh nghal zat a; point 91 hmuin El Clasico hnehna nen Catalan team tan La Liga title a hmin zui ta a, coach Hansi Flick-a hoin Spanish top flight title an la zawn thei ta a ni.
Nikum pawh khan Flick hian Catalan team-a a season khatnaah La Liga title leh Copa del Rey trophy a lakpui tawh bawk.
Barca hian tun season-ah league match li chiah tlawm an nei a, point kua lai hmuh tur la awm chungin an champion fel hman der!
Point 69 hum chungin Villarreal pawhin pathumna an luah ve ta bawk.
Pathianni Nou Camp khelmuala El Clasico kha kum 100 dawn chhunga El Clasico hmanga league title an tihchian vawi khatna a ni.