La Liga title race a chep zual sawt

La Liga title race a chep zual sawt
Inrinni Madrid derby-ah chak zawk awm loin Spanish La Liga hmahruaitu Real Madrid leh an hnuai chiaha thu Atletico Madrid an innehtawk a, Pathianni zanah pathumna luahtu Barcelona-in Sevilla muala point thum an hlawhchhuah bik avangin khelh 23 theuhah a sang pathumte inthlauhna hi a zim ta hle a, an inkarah point khat theuh chauh tla tawhin, title race a chep sawt hle a ni.
Ramon Sanchez Pizjuan stadium-a inkhelah La Liga top scorer ni mek Robert Lewandowski bawk kha goal hmahruai thuntuah tang lehin, minute sarih an khel tling hlawt tihah Inigo Martinez-a ball tauh hmangin season kal laia a league goal 19-na a khung a; mahse, mualneitu team beiletin minute khat em pawh a liam hmain an siphurh an sut ve leh ta mai a, Sevilla goal neihchhun ni zui ta hi Barcelona midfielder hlui Saul Niguez-a pass atanga Ruben Vargas thun a ni.
Second half tanna an thah fel chauh tihah Fermin Lopez chuan Pedri siamsak atangin mikhual team hmahruai nawnna goal khungin, minute 62-ah Djibril Sow laka a foul avangin second half substitute Lopez hi straight red card hmanga hnawhchhuah a ni zui ta nghe nghe a, minute 15 chiah khelmuala a khawsak chhungin goal a khung a, red card a hlawhchhuak tel bawk!
Lopez-a red card hmuh hma minute 55-ah Leeds United atanga kum 2022-a an sengluh Rapinha chuan Barca goal thumna thawh ve lehin; a tam zawk an nih hnuah pawh Sevilla-in an siphurh an sut thei lo mai ni loin hun tawp dawn minute 89-ah Eric Garcia chuan 4-1-a Catalan team chakna goal ni zui ta a thawh ve leh hram a ni.
An league game khelh hnuhnung vawithuma chak nei miah lo Sevilla muala an point thum hmuhchhuah leh hmangin point 48 neitu Barcelona hian an chung chiaha awm Atletico chu point khat chiahin an thlau ta a; hmahruaitu Real lakah pawh point hnih chiahin an hniam tawh.
Hansi Flick-a team Barca hian karleh Thawhtanni, February ni 17 home game-ah table-a parukna luahtu Rayo Vallecano an hmachhawn ang a; kartawp Pathianni zanah 13-na thuttu Sevilla-in Valladolid an luhkhung thung ang.
Inkhelh banah Barca defender Inigo Martinez chuan title race nawrchep an duh avangin chak an mamawh tih a sawichhuak a, an point thum hlawhchhuah hmanga an chunga chuang team pahnih laka pressure na zawk an siamsak thu sawi chungin:
“Kan thawkho tha a, he result hi kan tana duhthusam niin, tuna kan rilru puthmang hi a duhawm ngawih ngawih a, nuam ti takin kan khel tluan a; player pakhatin tlem mah ila goal kan venhim that bakah goal khat dang kan la thun belh thei zawk cheu a ni,” a ti.
Chak zawk awm lo Madrid derby
Inrinni La Liga inkhel pakhatah siphur hmasa zet chungin mualneitu Real Madrid chuan an mikhual Atletico Madrid lakah 1-1 draw an hlawhchhuak thei hram a, Madrid derby-a lawm zawk chu Carlo Ancelotti team kha niin an lang!
Santiago Bernabeu stadium-a mipui 78,082 zet pungkhawm hmaah penalty atangin Julian Alvarez chuan mikhual Atletico hmahruiana goal a chhuihlut a; kha ‘Panenka’ style penalty kha Real goalkeeper Thibaut Courtois chuan dang zo loin first half minute 35-ah Diego Simeone-a team-in hma an hruai.
Second half tir lam minute 50-ah Real Madrid forward Kylian Mbappe chuan mualneitu team siphurh sutna goal thawh ve lehin, kha bak kha goal dang a luhbelh lo a, chak zawk awm loin team pahnih an tin a, Los Blancos-in table-ah hma an la hruai chhunzawm thung.
Nizan inkhel result tarlan hman lohah Barcelona-in Sevilla muala point thum an hmuh theih chuan hmahruaitu team hi an rawn hnaih chho ve leh hret ang.
Real Madrid hian Champions League knockout phase play-offs first leg lamah Manchester City an luhkhung dawn a, chu mi lamah chuan rilru an insawrbing zui rihin a rinawm.