Labour-te bana kaih dan kan duang
– Lalnghinglova Hmar
Mizoramah labour-te chawikanna turin Mizoram Building & Other Construction Workers Welfare Board (MBOCWWB) kaltlangin bana kaih an kalpui dawn tih LESDE minister Lalnghinglova Hmar chuan Union Labour minister leh India rama Labour minister dangte hmaah a sawi.
January 29 & 30 chhung khan New Delhi-ah India rama state leh union territory hrang hranga Labour minister, secretary leh official-te inkhawmpui neih a ni a. Mizoram minister hian thu a sawi bakah January 29 tlaia session hnuhnung ber inkhawm a kaihruai.
“Labour chungchangah hian kan thusawi a inthlau khawp a. State lianin mihring nuai mai ni lo, maktaduai bia thil in sawi laiin Mizoramah chuan nuai bi pawhin kan sawi thei loa, hnathawktute tana sum khawnkhawm (cess collection) pawh in sawi leh kan sawi a inthlau hle. Hei vang hian state lian leh state te zawk min hrutrual vek loin, kan state mila kan kal theih dan ngaihtuah a ngai a ni,” a ti.
Union Labour minister Dr Mansukh Mandaviya hnenah thu thlenin, “State lian zawk tih ang zawng zawng kan ti thei loa, chutih laiin keimahni milin dan bawhchhe si loin dan pawhfân min phalsak ula, BOCWWB hnuaia sum awmte hman kawngah pawh Mizoram mila kal kan duh a ni,” Lalnghinglova Hmar hian a ti.
LESDE minister chuan MBOCWWB meeting hnuhnung berah labour-te hmasawnna tura an bana kaih dan an duang a, hmang tan turin an inbuatsaih mek tih a sawi. Zirna lamah pawh nasa zawka ke pen tum a ni tih a sawi bawk.
Inkhawmpuiah hian India rama labour-te dinhmun chawikan dan tur leh khawvel hmasawnna mila inher rem dan tur zir a ni.
Labour-te bana kaih dan kan duang – Lalnghinglova Hmar
Get real time updates directly on you device, subscribe now.