LADC-ah MNF leh INC-in sawrkarna siam tum leh

On Jan 10, 2026 1 0

LADC-ah MNF leh INC-in
sawrkarna siam tum leh
Lai Autonomous District Council 12-naah sawrkarna siam tuma an invehkual zak zak hnu ah Mizo National Front leh Indian National Congress chuan a tum hnihna atan sawrkar siam tumin United Legislature Party hnuaiah thawhdun an tum a, sawrkarna an siam theih thu larsap hnenah an thlen tawh.
2025 December 3-a Lai ADC inthlanpui neihah party mala sawrkar siam thei an awm loh avangin sawrkar siam tuma hmalakna tum thum a zuzi hnu ah, member 8 nei MNF leh member 7 nei Congress hian United Legislature Party (ULP) diin, larsap hnenah sawrkarna an siam theih thu Zirtawpni khan MNF vice president, leader of opposition Lalchhandama Ralte kaltlangin an thlen a ni.
ULP hian an hruaitu atan MNF member, Lawngtlai Chandmary bialtu MDC C Lalsawmzuala an thlang a, LADC-ah sawrkarna a siam theih thu leh thlawptu a ngah tawk thu larsap hnenah thlenin, chhanna ngaichan mek a ni.
LADC ah hian inthlanpui neihah bial 25 awmah MNF-in bial 8 la in, INC-in bial 7, ZPM-in bial 6, BJP leh independent-ten bial hnih ve ve an la a ni.
Inthlan result hriat fel hnuah inthlan laia thawk dun MNF leh Congress thawhdunna chu Congress-in chhuchatin, ZPM leh Congress chuan thawhdun tumin hma an la a, ZPM thuneitu sang lamin thawhdun an remtih loh avangin ZPM leh MNF hian thawhdunna tur thui tak kalpuiin, sawrkar ruangam tur pawh siamfel a ni a. 2025 December 15 khan an hruaitu ZPM member T Zakunga chuan larsap hnenah sawrkar a siam theih thu a thlen a ni.
Larsap hnen atanga chhanna ngaihchan a nih laiin, January 6 khan MNF Gen. Hqrs. chuan ZPM nen an thawhdunna an chhuchat a, LADC-ah sawrkarna siam tura indawrna a kal kual mek laiin, MNF leh Congress hian United Legislature Party dinin, sawrkarna siam an tum leh ta a ni.