LADC-ah sawrkarna inthlak dawn

LADC-ah sawrkarna inthlak dawn
11th Lai Autonomous District Council term kal meka MNF leh Congress sawrkar intawm siam chu a tlu a, ZPM sawrkar a piang thei dawn.
LADC-ah hian ZPM-in sawrkar ding lai lehthal tumin chief executive member C Lalmuanthanga kaihhruai Congress leh MNF sawrkar intawm rintawk lohna an pulut a. Larsap remtihnaa District Council & Minority Affairs secretary Sangchhin Chinzah chuan LADC chairman VL Hmuaka hnenah lehkha thawnin, February 12-a sawrkar dinglai buk turin LADC inkhawm hmanhmawh ko turin a ti a ni. Sawrkar buk ngai loin CEM hian banna a thehlut a ni.
Elected member 25 awmna LADC-ah hian MNF MDC zinga pali chuan Nilaini khan an party chhuahsanin ZPM an zawm a, heti hian ZPM chuan member 9 a neih sa nen member 13 a nei. MNF leh Congress tangdun United Legislature Party (ULP) in member 12 a nei ta a. An ni bakah hian ULP hian nominated member pali a nei a, an zinga pahnih hi ZPM-a pem zingah an tel. Hemi nen chuan ZPM hian member 15 neiin ULP hian member 14 a nei thung.
MNF atanga ZPM-a pem ta te hi, elected MDC pahnih – Paithar bialtu V Zirsanga leh Sekulh bialtu Lallawmsanga Apetow an ni a. Nominated MDC pahnih – H. Lalramfawna leh Z Ngunchhini an tel bawk.
ZPM Legislature Party hian Nilaini khan hruaitu an thlang nghal a. Leader-ah V Zirsanga, deputy leader Manghmuga Chinzah, secretary LR Dingliana Chinzah leh treasurer-ah BN Thangpuia te thlan an ni. ZPM Legislature Party hian Mizoram larsap hnenah sawrkarna an siam theih thu thlen thuai an tum a ni.
MNF chhuahsana ZPM zawm ta V Zirsanga hi 11th Lai Autonomous District Council term kal meka MNF sawrkarah chief executive member a ni a, eiruk thubuaiah Special Court-in thiam loh a chantir avangin party chhungah CEM atanga inhnukdawk tura a awm a, MNF MDC zingah leh eptu MDC ten larsap hnenah thlawptu a ngah tawk tawh lo, tiin, LADC Special Session ko turin an ngen a; a dinhmun buk a nih hma in CEM a nihna atang hian a bang a ni. MNF leh Congress tangdun ULP din hnu ah adviser to CEM-a dah zui a ni.