Tunkar Zirtawpni thleng awh tur Lai Autonomous District Council emergency session chu Thawhtanni khan chairman VL Hmuaka kaihhruaiin LADC Session Hall Lawngtlaiah neih tan a ni a. Sawrkar kum kal meka an budget tur nuai 24359.21 pharh a ni.
Session tan ni hian LADC MDC hlui thi ta VL Hminga sunna hman a ni a. Chief executive member C Lalmuanthanga’n LADC budget a pharh bakah House ah bill pakhat a pulut.
CEM sawi danin, state sawrkar chuan District Council-te sum a pek dan tidanglam hretin, a hmanna bik tur bithliah loin a hlawmin a pe a; hei hi session-ah a hmanna tur ruahman niin, salary atan cheng nuai 23126, non-salary atan nuai 1233 dah a ni. Budget hi a vaiin cheng nuai 24359.21 niin, kum kalta 2023- 2024 aiin nuai 3238.49 in a tam zawk a ni.
Kum kaltaa sum indaihlohna phuhrukna tur, Supplementary Demand for Grant nuai 1785.44 pawh CEM hian House-ah a pharh a. Kum 2024- 2025 chhungin chhiah tlingkhawm atangin cheng nuai 350 hmuh tum a ni.
Thawhlehnia Session-ah a hma nia CEM-in a putluh – The Lai Autonomous District Council (Constitution, Conduct of Business, etc) (Fifth Amendment) Bill 2024. chu House ah sawiho niin pawm a ni
LADC-a deputy chairman ni lai CL Lianzuala chuan Thawhtanni khan chairman hnenah banna a thehlut a, vawiin thutkhawmah deputy chairman thar tur hi thlan a ni ang.
Thudawn danin, deputy chairman atanga bang ta CL Lianzuala hian MDC dang 8 nen kumin June 20 khan ZPM an zawm a, tuna Congress leh MNF sawrkar intawmah deputy chairman a nih zui zel chu a rem tawh loa ngaiin a nihna a bansan a ni.
LADC budget nuai 24359.21
Get real time updates directly on you device, subscribe now.
Prev Post
Next Post