Lady Gaga album thar ‘MAYHEM’ No.1-ah a debut

Lady Gaga album thar ‘MAYHEM’ No.1-ah a debut
Lady Gaga album thar, a studio album pasarihna, ‘MAYHEM’ chu Billboard 200 (albums) chart No.1-ah a debut a, he chart-a Gaga album No.1 kai thei pasarihna a ni a, hmeichhe zaithiam zingah kumina album tlangzarh-ah chuan kar khat chhunga hralh tha ber a la ni. Hetihrual hian BLACKPINK member Jennie debut solo album ‘Ruby’ pawh chart top 10-ah a debut.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Lady Gaga ‘MAYHEM’ hi kar khat chhungin 2,19,000 an hralh thei a, chung zinga 1,36,000 chu album tak tak hralhna niin, 80,500 chu streaming atanga album tlukpui (on-demand official stream maktaduai 108.05) niin, album-a hla a mala hralhna atangin 2,500 a tling thei bawk.
‘MAYHEM’ hi Gaga album he chart-a No.1 kai thei pasarihna niin, a album dang A Star Is Born (Bradley Cooper nena an album intawm, 2018 a tlangzarh), Joanne (2016), Cheek to Cheek (Tony Bennett nena an album intawm), ARTPOP (2013) leh Born This Way (2011) te pawh No.1 a lo kaipui tawh a, a album dang ‘The Fame’ chu 2010 khan No.2 a kai tawh bawk. ‘MAYHEM’ hi Gaga album chart top 10-a lang thei 10-na a ni tawh bawk.
Kendrick Lamar ‘GNX’ chu 81,000 hralh lehin No.1 atangin No.2-ah a tawlh a, chart top six a lang album dangte pawh chart No.1 hlui vek niin, PARTYNEXTDOOR & Drake ‘$ome $exy $ongs 4 U’ chu 79,000 hralh lehin No.2 atangin No.3-ah a tawlh a, SZA ‘SOS’ chu 69,000 hralh lehin No.4-ah bawk a la awm a, Tate McRae ‘So Close To What’ chu 63,000 hralh lehin No.3 atangin No.5-ah a tawlh a, Sabrina Carpenter ‘Short n’ Sweet’ chu 61,000 hralh lehin No.5 atangin No.6-ah a tawlh ta bawk.
BLACKPINK member Jennie solo album hmasa ber ‘Ruby’ chu 56,000 hralhin No.7-ah a debut a, he chart-a solo artist anga a lan vawi khatna a ni. ‘Ruby’ album-ah hian hla 15 awmin, a hla tihchhuah tawh ‘Mantra,’ ‘Love Hangover’ (Dominic Fike nena an zai dunna) leh ‘ExtraL’ (Doechii nena an zai dunna) te pawh a dah tel.
Jennie hian BLACKPINK group angin No.1 album dang ‘Born Pink’ (2022) a nei tawh a, an group album ‘The Album’ chu 2020 khan No.2 a kai tawh bawk. Jennie hi BLACKPINK member zinga mahni puala top 10 album nei thei pathumna niin, LISA album ‘Alter Ego’ chu kar kalta chart-ah khan No.7-ah bawk a lo debut tawh a, ROSE album ‘rosie’ chu nikum December khan No.3-ah a debut tawh bawk.
Chart No.1 hlui Bad Bunny ‘Debi Tirar Mas Fotos’ chu 52,000 hral lehin No.6 atangin No.8-ah a tawlh a, chart No.1 hlui bawk Morgan Wallen ‘One Thing at a Time’ chu 43,000 hralh lehin No.9-ah bawk a la awm a, Chappell Roan ‘The Rise and Fall of a Midwest Princess’ chu 42,000 hralh lehin No.8 atangin No.10-ah a tawlh ta bawk.