Lady Gaga & Bruno Mars ‘Die With a Smile’ 1B view club-ah

Lady Gaga & Bruno Mars ‘Die With a Smile’ 1B view club-ah
Lady Gaga leh Bruno Mars hla hit ‘Die With a Smile’ music video chuan YouTube-ah vawi tluklehdingawn en a hlawh ta a, Mars tan a music video hetiang zat en hlawh thei 10-na niin, Gaga tan a palina a ni ve thung. YouTube-a music video vawi tluklehdingawn en hlawh thei zaithiamte lar dan leh an hla lar dan te tehna pawimawh chi khat a tling tawh a ni.
‘Die With a Smile’ hi thla riat vel kaltaa an tlangzarh kha niin, a video-ah hian Gaga leh Mars an inlan a, Mars pawh cowboy lukhum var nen inlanin, Gaga pawhin cigarette a pet kawh deuh reng a. A video hi nikum August ni 16-a Mars concert, Intuit Done, Inglewood, California-a an sak dun zanah tak an tichhuak nghe nghe a ni.
‘Die With a Smile’ hi Billboard chart lamah pawh a hlawhtling hle a, Billboard Hot 100 (singles) chart-ah kar nga a No.1 a, a hla hi Gaga No.1 album ‘MAYHEM’-ah khan a dah tel nge nghe. He hla avang hian 2025 Grammy Awards-ah Gaga leh Mars te ian best pop duo/group performance an dawng bawk.
Bruno Mars hian kuminah YouTube-a vawi tluklehdingawn en hlawh thei music video pahnih a nei ta a, February thla khan ROSE a zaipuina ‘APT.’ chuan he mellung hi a lo kai tawh a, ‘APT.’ music video hian YouTube-a an upload atanga ni 105 chhungin vawi tluklehdingawn en a hlawh thei a, music video zinga hetiang zat en hlawh ran theihah panga a ni. YouTube-a music video vawi tluklehdingawn en hlawh rang thei ber record siamtu chu Adele ‘Hello’ kha niin, 2015-a a video a tihchhuah khan ni 87 chhungin vawi tluklehdingawn en a hlawh hman a ni.