Lakers an chak zel

Pathianni zing khan NBA 2024-25 khelh chhunzawm a ni a, Los Angeles Lakers chuan a vawi thum nan hnehna chang zawn turin an khingpui Sacramento Kings an hneh. Pathianni zinga inkhel dangah Phoenix Suns in hnehna an chang ve bawk.
Season tharah vawi hnih chak zawn tawh LA Lakers hian Sacramento Kings an hmachhawn a, an khel tha leh pek viau. First quarter leh second quarter-ah point hnih an chungnung ve ve a, point li-a hmahruai chungin chawlhlawk an hmang.
Chawlhlawk hnu lamah Sacramento Kings in bul an tan tha a, quarter thumnaah point 9 laia chungngunin an khingpuite an lehthal. Chawlhlawk hmaa an hmahruaina hlohin, hnufual zawkah tang mah se LA Lakers hi quarter hnuhnung berah an insiamtha a, point kua in an chungnung zui ve leh a, Sacramento Kings hi point 131-127 in an hneh.
Sacramento Kings an hneh theih nan LeBron James leh Anthony Davies ten LA Lakers tan an thawhhlawk dun hle. NBA player ropui ber LeBron James chuan point 32 a thawkchhuak a, ball sawhlet vawi 14 ngawt a dawn bakah assist vawi 10 a nei tling bawk a, tre-ble double a puitlin. LA Lakers tan hian Davies chuan point 31 a thawkchhuak ve bawk. An khingpui lakah tlawm bawk mah se Kings tan hian Domantas Sabonis chuan point 29 a thawkchhuak a, ball sawhlet vawi 12 neiin, assist vawi 10 a nei bawk a, treble double a puitlin ve bawk.
Pathianni zinga inkhel dangah Phoenix Suns chuan an khingpui Dallas Mavericks chu point 114-102 in an hneh. Mavericks an hneh tum hian Kevin Durant chuan point 31 a thawkchhuak. Durant hian NBA-ah season 17 a khel tling ta chiah a, point 29,010 a thawkchhuak tling tawh a. NBA-ah point 29,000 chuang thawkchhuak thei pariatna a ni. NBA a point thawkchhuak hnem ber chu LeBron James a ni a, James hian NBA-ah a season 22-na a khel meka point 40,543 a thawkchhuak tawh.
Pathianni zing hian champion lai Boston Celtics chuan harsa takin Detroit Pistons an hneh a, an khingpuite hi point 124-118 in an hneh thei hram. An khingpuite an lehthal tum hian Jayson Tatum chuan point 37 a thawkchhuak.