Lakhuih thar tam Sialhawkin kuminah qtl. sing 2 thar inring

Lakhuihthei huan siam leh a thar lama thawhhlawk Sialhawk khua chuan kuminah quintal 20000 vel thar theih an inbeisei a, an hralh tawh zat hi quintal 700 chuang a ni.
The Aizawl Post thudawn danin, lakhuihtheih thar tam inring Sialhawkah hian kawng chhia vangin harsatna an lo nei zauh zauh tawh thin a. Kuminah pawh fur ruahtui tlak tam lai chu an thar vanglai tur a nih ve tho avangin an huan siamna kawng, link road chu a chhe tan a, an thar chhuah an lakchhuah kim hma in a chhiat nasat hman viau a rinawm avangin sawrkarin ruahmanna siampui se an duh hle tih an sawi a ni.
Kum hmasa lamah Sialhawk lakhuihthei thar hi India ram state dang bakah ram pawn thlengin hralh tura thawn chhuah a ni a. Kuminah pawh Delhi, Kolkata leh Mumbai bakah foreign atang pawhin order an hmu a. Mahse, hmun hla zawka hralh tur hian a pack-na tur plastic crates a vang thin a, Sialhawk thlenga lakhawm turin crates man a to bawk si a. Hmun hla zawkah an hralh theih loh phah thin tih an sawi.
Kumina an tharchhuah tura an inbeisei zat pawh hi Mizoramah chauh chuan hralh zawh sen chi nia a lan loh laiin, state pawn lama hralh tur chuan ruahmanna siam a la awm rih lo tih thu dawn a ni.
Thudawn danin, Mizoram puma lakhuihthei thar chhuah zaa 64 hi Sialhawk thar a ni a; Sialhawk chhehvel khuate nena an thar chhuah chu Mizoram puma thar zaa 92 a tling pha nia chhut a ni.
Tunah hian Sialhawk khuaah lakhuihthei huan nei chhungkua 250 vel an awm a ni.