Laldenga Auditorium din tum thulh

Laldenga Auditorium din tum thulh
Aizawl lailia Assam Rifles chhuahsan rama Laldenga Auditorium din tum chu sut leh a ni a, a aiah convention centre – ‘Vanapa Hall’ din tum a ni.
Assembly Session-ah, Assam Rifles chhuahsan ramah Laldenga Auditorium din tumin sawrkar hmasa hunah Union Home minister chu a lungphum phum tir a ni a. Hei hi chhunzawm tumna a awm em, tih zawhna chhangin GAD changtu chief minister Lalduhoma chuan, Assam Rifles chhuahsan ram hman zui dan turah sawrkarin a kaihhnawih mi hrang hrang bakah political party tin telna Advisory Committee a din a, heta MNF aiawh telna ngeiin Laldenga Auditorium sak tum hi paih leh a ni a, convention centre lian tak, lirthei dahna awm telin din nise an ti ta zawk tih a sawi.
“Advisory Committee member atangin ziakin Laldenga Auditorium awm lo tura rawtna kan dawng a. Hei hi kan ngaihtuah a, a aiah convention centre neih kan rel thlu. A tua mahin kan sawisel lo. Tunah rawtna thar a rawn lut leh a, Vanapa Hall hi sak that a hun tawh a, hei hi thiah a, thil tangkai danga hman nise, AR ram chhuahsana convention centre sak tum hi Vanapa Hall hming hi put tir ni rawh se, tih ngaihdan a lo lut a, hei hi kan pawm ta niin ka hria,” a ti.