Lalit Jha hringtu pain a fapa chhuah turin ngen

Kum 68-a upa Devanand Jha chuan a fapa kum 28-a upa Lalit Jha, Parliament security breach a meizanghlaptu bera ngaih chuan hrem a tawrh theihna tur thilsual tih a nei lo a ti. Devanand Jha chuan unemployment avanga miin aw a chhuahna chu phatsanna a ni lo, police ten an chhuah nghal tur a ni a ti bawk.
Delhi Police-te chuan Lalit Jha leh midang panga te lakah Unlawful Activities (Prevention) Act, anti-terror law hmangin thubuai an siamsak a ni.
“Lalit hi ka fapa pahnihna a ni a. Talented tak mai leh midang puih inpeih at reng mai a ni,” tiin a pa chuan a sawi bawk a, science-ah graduate niin doctor nih tum a ni a. A mamawh phurhuk nan Kolkata-ah tuition a pe a ni, a ti bawk.
An chhungkua chu Kolkata-a cheng an ni a, December 10 khan Lalit chuan Darbhanga an panna turah Sealdah railway station thlengin min thlah a ti bawk a. “Ka ke a khawiha malsawm nan Rs 250 ka pe a. Delhi-ah hna pawimawh titura a kal tur thu min hrilh a. Eng hna pawimawh nge tih erawh ka hre lo,” tiin Devanand Jha chuan a sawi bawk a. An chhungkua chu room panga awmna Rampur Udai village a pi leh pute atanga an chenna inah an awm mek a.
Devanand Jha chuan a fapa chet dan chu duhthusam a ni lo tia sawiin, ‘mahse he ram chhunga unemployment issue a aupui erawh a dik a ni. Sual dang heng tualthah, rukruk emaw mi suam emaw a ti lo’ tiin a sawi bawk a.
Devanand Jha chu full-time priest niin kum 15 kalta kha chuan loneitu a ni a, bighas 3 zau a enkawl thin a, a hriselnain a tlin tawh lo thung. A fa u ber chu hmeichhia niin pasal neiin Darbhanga-ah an awm a, a fa phnihna chu Kolkata-ah an chhungkuaa chengin garment shop an nei a, a fapa pathumna chu electrician a ni thung.
Jha chuan a fapa chuan Bhagat Singh leh Chandrasekhar Azad te a ngaisang a ti bawk a. “Kolkata a room-ah heng revolutionist pahnih te thlalak hian a room a chei chhuak vek tawh. Society-ah danglamna thlen a duh thu a sawi fo thin,” tiin Devenand Jha chuan a sawi bawk.
Lalit Jha nu Manjula Jha kum 62-a upa erawh tap reng thungin a fapa chu chhuah turin a ngen a. “A chet dan pawizia ka hrethiam lo, ka hriat chhun chu sual lian a ti ngai hauh lovang tih a ni. Kum hnih kalta khan kan khua a lo tlawh a, a lo kal apiangin naupang te thil a zirtir thin” tiin a sawi a. “Niminah police-te kan inah an lokal a, chuta tang chuan Delhi-ah thil tha lo a thleng tih leh ka fapa a inhnamhnawiha police ten an man tih kan hre ve chauh a ni,” tiin a sawi bawk.
A nu leh pate chuan a hun awla an fapain eng nge a tih a sawi ngai lo an ti dun bawk a. A nu chuan Delhi-ah eng nge a tih dawn a tih pawhin thiante hmu turin a kal dawn tiin min chhang a ti bawk.
“Ka u pawhin Kolkata-ah police ten thu an zawhfiah thu a sawi a. Engmah tihsual a nei lo, police-te chuan kan monu pawh thu an zawtfiah bawk a. Kan chhungkua min en ula, hetiang thil sualah kan inhnamhnawih lovang tih in hre mai ang. Hun rei lo te hnuah ka unaupa hi an chhuah zalen ka beisei,” tiin Sonu Jha chuan a sawi bawk.
An khuaa chengte pawhin an tan hle a. An thenawma cheng Ajay Jha chuan, “Mi rinawm leh dik tak chhungkua an ni,” tiin a sawi a, he khuaa ami tho Priyaranjan Mishra pawhin, “An chhungkua hi kan hrechiang a, firfiak a ni lo. Mi simple tak leh revolutionary rilru nei a ni,” tiin a sawi bawk.
Lalit Jha chuan security breach video chu West Bengal-a a thian NGO a thawh tawhna ami chu thawnin chu mai bakah a thiante mobile phone te chu a tichhe vek tia sawi a ni bawk.