‘Lalna leh thuneihna thlakhlelh vangin kum hnih hnua kawng siam’

‘Lalna leh thuneihna thlakhlelh
vangin kum hnih hnua kawng siam’
Zirtawpni khan Hnam Run-ah MNF-in chhung inkhawm an nei a, he huna thusawitu, MNF general secretary, legal board vice chairman ni bawk Lalpianfela Chawngthu chuan AMC inthlana lalna leh thuneihna thlakhlelh vanga kum hnih hnua kawng siamah sorkar a puh.
“AMC Inthlan puan a lo ni ve ta a. Khawvel sorkarah hian duh duh huna inthlan puan ching an awm a, chung zingah chuan North Korea te, Burma te an tel a. Tun hnaiah anni ram pahnih pawh an inthlang ve ve tawh. ZPM hian heng ramte hi a entawn mek a, VC inthlan min sawn hnaihsak a, AMC inthlan min sawn hlatsak thung a, dan awm sa reng palzutin, lalna leh thuneihna an channa tur hun remchang, an chet that hun thlirin mipui min inthlanpui a. Mizoram mipui hian ZPM hnuaiah hian ‘North Korea of the West’ nge kan nih ‘Burma of the West’ kan nih pawh kan inhre hrang thei tawh lo a ni,” a ti.
2018-a MNF a sorkar khan Congress sorkarin kawng chhe pui pui a hnutchhiah te siamthat hna an thawk nghal niin a sawi a, ZPM sorkar erawh chu MNF sorkarin kawng tha a hnutchhiah avangin kum hnih chhung kawng siamthat hna thawk mumal lovin an awm thei nia sawiin, “An vannei chungchuang hle a, an sorkar atanga kum thumnaah kawng an han siamtha ve ta hram a, heng an kawng siamthat mek, kawng a nihna tura lai dar a, tha tam tak lo seng tawhtute chu engmah thawh nei lova an sawi thin, sorkar hmasate an ni,” a ti a, an kawng siamthat mekte hi mipui min hmangaih avanga siam ni loin AMC inthlana lalna leh thuneihna an thlakhlelh vanga siam an ni tih hi mipuiin an hria niin a sawi. Kawng siam nan hian mipuiin chhiah kan chawi avangin ZPM sorkar hnuaiah hian engtik lai pawhin kawng tha neih hi mipuite chanvo a ni a, kan veng kawng a chhia a nih chuan ZPM hi vote nawn kan ba miah lo, a ti.
MUHCS chungchang pawh a sawi a, MUHCS 1.0 kha mipuite leh opposition party-te pawhin heti em em te chu kan tlin reng ang emaw kan ti hial a, mipui pawh kan lawm, tiin, MUHCS 2.0 a lo chhuak a, 1.0 rawng senduk kha a sen lar pawh ni loin, a sen dang a ni chho dawn ta niin a lang, a ti.
“Pensioner-te hi tun dinhmun Mizoramin kan thlen theihna tur atana thi leh thau pawlha, a thim avar pawh thlu lova kan ram leh hnam tana hma lo hruaitu leh kawng sialtu an ni, an thiamna leh finna zawng zawng hmanga min kaihruaitu leh theihna zawng zawng kan ram tana lo hlantu kan pi leh pute hian duat an phu kan ti em le? ZPM sorkarin hetiang mai maia a enkawl hi an phu lo a ni. MUHCS 2.0-ah an dinhmun a chhe chho ta hi a pawi tak zet a. Sorkar tha chuan a senior citizen-te a tuamhlawm tur a nih laiin, ZPM sorkar hi chuan kum upa te pawh an huphurh tawh em em mai a ni,” a ti.
MUHCS 2.0-ah pensioner-te an lawm lo a, sorkar hnathawk pawh MUHCS hmaa an awm theihna Hospital-ah an awm thei tawh dawn lo niin a lang tiin a sawi a, “MUHCS chungchanga Pvt.Hospital-te nena agreement an siamna rate an puangzar ngam lo te hi eng dan nge an tlawhchhan? Mipui sum – public fund hmanna chipchiar puanzar ngam loh hi dan bawhchhiatna a ni a, thil dik lo pawh awm se mipuiin kan hre thei dawn lo a ni,” a ti.