Lalpa Chhiahhlawhten a vaiin vote 3582 hmu

Zoram Thar Zofate Lairelna-in kumin MLA inthlanpuia an pawl hminga ding Lalpa Chhiahhlawh Intelkhawm chuan a vaiin vote 3582 an hmu.
Zoram Thar Zofate Lairelna hian Zirtawpni khan Lairel (committee) an nei a. Hruaitu bakah hruaitu chhangdawl panga, ziaktu panga, sum vawngtu, sum ziaktu, district tin enkawltute, thurawn petute leh Lairel membar an ruat.
Kumin inthlanah Lalpa Chhiahhlawh Intelkhawm ding zawng zawngte inpekna rah an hmu tih sawiin, result-ah Lalpa hnenah lawmthu an sawi a. A belhkhawmin vote 3582 an hmu tih an sawi a. ‘Lalpa lama tang ngam, an vote hlu tak Lalpa Chhiahhlawh intelkhawmte bawma thlak ngam heti zat an awm hi ropui kan ti hle,’ an ti.
Sawrkar thar, mipui tana rawngbawl tur MLA thlantlinte an lawmpui thu sawiin, Lalpa tan rinawm taka hna an thawh theih nan duhsakna an hlan tih an sawi a ni.
District, khua leh veng tinah Lairelna din an tum tih an sawi a. Kum 2024-ah Zofate Pathian Biakinpui sak tan an tum a, Zofate zawng zawng kan inpumkhatna tur hnam biak in hnatlanga sak tur a nih angin, a tul tul buaipuitu atan committee pawimawh tak a ni dawn tih an sawi. Heng bakah hian NGO anga an lo buatsaih tawh thin Zofa Lelte 2024 ah buatsaih leh an tum a. Pathian Lalram Zofate ah din a ni mek a, din a nih zel theih nan theihtawpa hma lak zel an tum tih an sawi a ni.