Lamar & SZA ‘Luther’ a la Hot ber

On Apr 2, 2025 13 0

Lamar & SZA ‘Luther’ a la Hot ber
Kendrick Lamar leh SZA hla hit ‘Luther’ chu Billboard Hot 100 (singles) chart-ah a No.1 a, he chart-a kar ruk a No.1-na a ni ta. Hetihrual hian Morgan Wallen ‘Just in Case’ leh Chappell Roan ‘Pink Pony Club’ te pawh top five-ah an lang.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre U.S. streaming (official audio leh official video), radio airplay leh sales data te chu tehna pawimawh a ni.
‘Luther’ hian radio airplay ngaithlatu maktaduai 58.3 a la nei thei a, stream maktaduai 26.3 leh sales 3,000 a la tling thei bawk a, hei hi a kar ruk nan chart-ah a No.1 pui leh ta a ni.
‘Luther’ hla hi R&B icon boral tawh Luther Vandross hming chawia a hla title hi an tih a ni a, a track-ah pawh a hming hi an lam chhuak a, Lamar tan Hot 100 chart-a a hla No.1 kai thei parukna niin, SZA tan a pathumna a ni ve thung a, kar ruk chin No.1 thei hla an nei vawi khatna bve ve a ni bawk.
Chart No.1 hlui Lady Gaga leh Bruno Mars ‘Die With a Smile’ chu No.3 atangin No.2 a kai thar leh a, chart No.1 hlui bawk Shaboozey ‘A Bar Song (Tipsy)’ chu No.6 atangin No.3 a kai thar ve leh ta bawk.
Morgan Wallen hla thar ‘Just in Case’-in stream maktaduai 21.8 leh sales 7,000 a neih bakah radio airplay ngaithlatu maktaduai 2.8 a nei thei bawk a, hei hi chart No.4-ah a debut pui ta a ni. Morgan Wallen hian chart top 10-a lang thei hla 14 a nei tling ta a ni.
Morgan Wallen hian May ni 16-ah a studio album palina ‘I’m the Problem’ a tlangzarh dawn a, ‘Just in Case’ hi he album atanga a single niin, he album-a hla dang ‘I’m the Problem’ (No.2, February 2025), ‘Smile’ (No.4, January 2025), ‘Love Somebody’ (No.1, November 2024) leh ‘Lies Lies Lies’ (No.7, July 2024) te chu chart top 10-ah an lo lang tawh bawk a, Wallen hian record siamin, album tlangzarh hma a, album-a tel tur hla he chart top 10-a lang thei ngah ber a ni a, he album la tlangzarh loh a hla awm tur hla panga chu chart top 10-ah a lang der tawh a ni.
A hmaa hetiang record siamtu chu Post Malone leh Taylor Swift niin, Post Malone hian 2019 khan a album ‘Hollywood’s Bleeding’ a hla pali chu album tlangzarh hmain chart top 10-ah a lang thei a, Swift album ‘Red’ a hla pali chu 2012 khan album tlangzarh hmain chart top 10-ah an lang thei bawk.
Chappell Roan ‘Pink Pony Club’-in radio airplay ngaithlatu maktaduai 38.1, stream maktaduai 15.1 leh sales 6,000 neiin No.9 atangin No.5-ah a invawrh a, a hla he chart top five-a lang thei pathumna a ni. He hla hi a album ‘The Rise and Fall of a Midwest Princess’ atangin Hot 100 chart top five-a lang thei awm chhun a la ni.
Chart No.1 hlui Teddy Swims ‘Lose Control’ chu No.12 atangin No.6-ah a invawrh thar leh a, he hla hi chart top 10-ah a zawn lovin kar 84 a lang tling ta a, he chart top 10-a lan rei theihah palina niin, Glass Animals ‘Heat Waves’ (kar 91), The Weeknd ‘Blinding Lights’ (kar 90) leh Imagine Dragons ‘Radioactive’ (kar 87) te chiah a pha lo.
Drake hla ‘Nokia’ chu No.11 atangin No.7-ah a insawn a, chart No.2 pawh lo ni tawh Benson Boone ‘Beautiful Things’ chu No.15 atangin No.8 a kai thar leh a, Kendrick Lamar hla, chart No.1 pawh lo ni tawh ‘Not Like Us’ chu No.8 atangin No.9-ah a tawlh a, chart No.3 lo ni reng tawh ROSE leh Bruno Mars ‘APT.’ chu No.14 atangin No.10 a kai thar ve leh ta bawk.