Lammualah Aizawl Day hmang mek

Lammualah Aizawl Day hmang mek
Mei mit loa Aizawl a din champha lawmna – Aizawl Day chu Nilaini atang khan Lammualah hman tan a ni a, Zirtawpni thleng hman an ni.
Aizawl Municipal Corporation (AMC) buatsaih Aizawl Day 2026 hawnnaah Aizawl mayor Lalrinenga Sailo chuan, AMC chu dan kengkawhtu a nih avangin mi thenkhat atangin diriamna an tawk thin a. Khawpui dangah chuan municipality hi kum 100 chuang kaltaah lo ding tawh a, hma an sawnnaah hmun pawimawh tak an chang tih sawiin, “AMC hi kum 2010 atang chauha din a ni chungin a thangduang hle a, Aizawl hmasawnna leh a chengte tana service pek kawngah nasa takin hna a thawk a ni,” a ti.
Aizawl Day lawmnaah hian pawl leh mimal 94 hnenah lawmman leh chawimawina hlan a ni a. International leh national level chawimawina /lawmman dawng, Aizawl tihmingthatu mi 21 hnenah Aizawl Day Award sem a ni. Local council tha 10 thlanchhuah hnenah lawmman pek a ni a, faina kawnga thawk tha pawl /huho 12 leh mimal 35 hnenah chawimawina hlan a ni. Sanitation workers tha thlanchhuah 6 leh bawlhhlawh phur lirthei khalhtu tha 10 thlanchhuah hnenah chawimawina hlan a ni bawk.
Aizawl Day 2026-ah hian eitur leh thil chi hrang hrang zawrhna stall hawn a ni a, naupang tana a thlawna infiamna hmun buatsaih a ni a, cosplay leh concert huaihawt a ni bawk. Mayor’s Cup – Inter Futsal Tournament khelh mek a ni.
Aizawl Day lawmna atan hian February 23 khan NHM Health Department nen tangdunin bawlhhlawh sawngbawltute tan Solid Waste Management Centre Tuirialah an hriselna enfiah sak an ni.