Lammualah Chapchar Kut hmang tan

Lammualah Chapchar Kut hmang tan
Kumina Chapchar Kut lawmna pui ber Aizawlah chuan Ningani khan Sipai Lammualah hman tan a ni a. Minister Lalthansanga chu ‘Kut Pa’ niin a hawng. Vawiin a ni hnihnaah chief minister chu ‘Kut Pa’ a ni thung ang.
Minister chuan Chapchar Kut kan hman chhoh zelah Zo nun zemawi hrang hrang chawisang tura thupui thlan a ni thin chu lawmawm a tih thu sawi a. Mizoram leh khawvel hmun hrang hranga Zofaten mahni awmna hmun theuhah Zo nun zemawi nunpui a, chawisang zel tur kan ni, tiin, kan bulhnai amite chungah hawihhawmna lantirin, Kut ropuina leh hlutna pholang zel turin a sawm tih a sawi,
Kumin Chapchar Kut lawmna atan hian a bikin Mizoram pawn atangin, Manipur Group YMA, Tripura Group YMA , Shillong Group YMA, YMA Halfong Branch leh Thangram Indigenous People hruaitute sawm an ni a. Lam entir turin Pang Cultural Troupe, Paite Cultural Troupe, Bawm Cultural Troupe, Hmar Cultural Troupe, Nagaland Cultural Troupe (NEZCC kaltlangin) leh Fiji atangin cultural troupe (ICCR kaltlanga) sawm an ni,
Chapchar Kut ni khatnaah hian zaipawl, malzai leh hnam lam hrang hrang saka entir a ni a. Sipai Lammual programme bakah hian Lammual atanga Vanapa Hall inkar kawngah ei tur leh thawnhmaw zawrhna stall engemawzat hawn a ni a; Vanapa Hall ah thlalak leh lemziak phochhuah niin, Aijal Club Park-ah pangpar lam chi entirna siam a ni.
Kumin Chapchar Kutah hian thupuiah “Zo nun Zemawi – Hawihhawmna” tih hman a ni.