Lando Norris-a hnehna kalkawng
Lando Norris-a hnehna kalkawng
Pathianni Miami Grand Prix-ah khan Red Bull triple world champion Max Verstappen hmakhalhin McLaren driver Lando Norris chuan a career-a a vawikhatna atan Formula One hnehna a rawn sualchhuak hlawl a, Verstappen bakah Republican presidential candidate leh US president hlui ni bawk Donald Trump pawhin langsar takin a lawmpui a, a hnehna kalkawng thui lotein bihchiang dawn teh ang.
F1 grand prix hnehna la chang lo zinga podium tum 15 lawnkai tling awmchhun Norris hian grand prix vawi 110 a tlan tawhah vawiriat ngawt pahnihna (runner-up) dinhmun a luah tawh a, US leilunga Miami International Autodrom-ah champagne a tauhhawng ve ta nge nge a nih kha.
Norris hian grand prix hnehna chang turin nghak rei thawkhat mah se nghak rei ber erawh a ni lo a, world champion hlui Jenson Button khan F1 hnehna chang turin race 113 a tlan tling a, Nico Rosberg pawhin lawmman semna dawhsan chungnung ber luah turin race 111 a mamawh ve bawk.
Red Bull driver pakhat zawk Sergio Perez pawh khan pakhatna dinhmun a luah hmain race tum 190 a hmachhawn hman a, nghak rei ber niin, Ferrari driver Carlos Sainz (150) leh Mark Webber (130)-te’n pakhatna dinhmun luah hmaa race hmachhawn tam top three an luah ve bawk a ni.
Pathianni intlansiak tan hma khan US president hlui Donald Trump chuan McLaren garage a tlawh a, intlansiak zawha pakhatna dinhmun luahtu Norris a hmuh nawn leh tumin an garage a tlawh chuan vanneihna a thlen tih a hrilh nghe nghe!
He British talent Lando Norris-a hming hi film hmingthang pakhat Star Wars character Lando Calrissian hming chawia a nu leh pa phuah niin, McLaren chuan Formula 1 huangah kum 2019 khan an hungchhuak a, chumi hma kum hnihah an driver ni tura sengluh a ni.
British motor racing team-a a debut season-ah Carlos Sainz nen inkawpin, point thawkchhuak chho mar hle mah se a kum khatnaah khan championship-ah top 10 a luah pha lo chiah chiah.
Kum 2020 khan a vawikhatna atan Eormula One rave-ah lawmman semna dawhsan a chuangkai a, a hnu lamah pawh podium hi luah chho deuh rengin, Russia 2021-ah phei kha chuan pakhatna a ni teuh hle nghe nghe.
Car intliansiak category hniam lamah hming chher hle mah se level sang berah pakhatna dinhmun a luah thei lawk lo a, Miami khawpuiah a ropui ni a nghakchhuak ve ta nge nge a ni.