Lapaw chini atangin CANCER

Tamil Nadu sorkar chuan laboratory test atangin lapaw chini (cotton candy)-ah cancer siam thei Rhodamine-B hmuh a ni tiin, February ni 17 khan an state chhungah hralh a khap nghal a. ‘Rhodamine-B telna hi, inneihna emaw public event-ah packaging, chawkluh leh eitur siamah a tel chuan Food Safety and Standards Act, 2006 hmangin hrem theih a ni’ tiin Tamil Nadu sawrkar chuan thuchhuah a siam nghal a ni.
Puducherry chuan February thla tir lam khan lapaw chini hi an state-a hralh a lo khap tawh a. Andra Pradesh pawhin candy sample test a nei mek a, Delhi pawhin lapaw chini hi khap a tum nia sawi a ni bawk.
Cancer siam thei chemical compound Rhodamine-B hi textiles dye nan te, cosmetics leh inks siam nan tea hman thin a ni a. Europe leh USA state thenkhatah pawh eitur rawng thlak danglam chu dan kalh, an lo ti tawh a ni.
Mizoramah pawh hian lapaw chini hi a lar hle a, engemaw puipunna huaihawt a nih tawh chuan, Vaihovin lapaw chini an hralh thei hle. Puipun nikhua ni kher lovah pawh, lapaw chini hi thil hralh kal tak a ni.
Mithiam ten lapaw chini-ah cancer thlen thei chemical compound a awm tih an finfiah tawh chuan, keini cancer hluarna state pawh hian, Mizorama lapaw chini zawrh leh siam hi khap nghal hmak tur kan nih hmel hle a ni.
Ei leh in thianghlim lo laka fihlim turin sawrkar chuan mipuite a zirtir chamchi a. Food & Drugs Administration lam pawhin mipui zirtirna te neiin eitur funna chiang lo te, rawng hmanga eitur sawngbawl te ei lo turin mipui an zirtir thin a. Khawchhak lam atanga eitur lo lut tam tak chu a siam ni leh a damrei zawng inziakna awm mumal lo a tam a, chungte chu zuar lo tur leh, mipui pawhin ei lo turin an zirtir thin bawk.
Heng zawng zawng hi a sawt mawh khawp mai a, sawrkar hian laboratory test kalpui thin se, a thianghlim lo chu khap hmak hmak se, khauh takin dan lekkawh zui thin se, hriselna lamah hma kan sawn phah ngeiin a rinawm.