Larsap-in CADC-ah a tih tur a tiZPM-in thla 6 kaltaa an duhdan

• BJP National secretary

Larsap-in CADC-ah a tih tur a ti
ZPM-in thla 6 kaltaa an duhdan

• BJP National secretary
  Thla 6 chhung atana Governor rule-a Chakma Autonomous District Council (CADC) a dah chungchangah Mizoram larsap chuan a tih tur dik tak a ti a. Governor rule-a dah hi ZPM sawrkar pawhin 2024 December-a an duh dan ang tho a ni tih BJP National secretary – Minority Morcha Delson Notlia chuan a sawi.
  BJP National secretary chuan Sixth Schedule to the Constitution of India hnuaiah hmarchhak state-ah Autonomous Council 10 a din a, Mizoram bikah Autonomous District Council pathum – Mara, Lai leh Chakma ADC awmin, India danpui chuan Mizoram leh Tripura larsap hnenah 20 BB (Sixth Schedule) hmangin ADC-te chungah discretionary power pe in, he thuneihna hmang hian ADC-te chungah thutlukna an lo siam tawh thin tih a sawi a ni.
  Chakma ADC chu tun term chauh ni lo, term hmasa lamah sawrkar a inthlak zing hle a, state sawrkar leh ADC dang pawh sum indaihlohna awm thin mah se, thla tam buai loin an inkhaichhuak leh mai zel a, Chakma ADC-a sum indaih lohna a nasat bik danah eirukna leh dan loa induhsakna a nasa tih a chiang tih a sawi.
  Heng avang hian Chakma civil society organisation lian pathum chuan tunhnaiah Mizoram larsap hnenah Governor rule-a thla 6 tal dah a, chumi chhunga CADC hotute dik lohna haichhuak tur inquiry Commission din turin an lo ngen tawh a, hemi tum hian chief minister Pu Lalduhoma pawh civil society-te hian hmu in, chief minister hian a ngaimawh zia hrilhin, theihtawpa hma lakpui a lo intiam tih Delson Notlia hian a sawi a ni.
  “Danpuiin in thuneihna a pek angin Governor rule-ah thla 6 atan larsap hian a dah a. Hemi chhung hian CADC sawrkarah thil tih diklo a awm chuan lo en a, siamthat hna thawk turin Lawngtlai DC thu a pe ta a ni,” a ti.
  MNF sawrkar laiin MADC-a sawrkar buainaah larsap chu thiat (dissolve) turin Council of Minister-in a lo rawn tawh a, larsap hian chutia ti ta lo chuan a ngawihsan a, MNF sawrkar hotulute emaw party-in emaw larsap an bei zui lo tih BJP hruaitu hian sawiin, sawrkar hmasa lamah larsap-in ADC chungah an thuneihna an lo hmang fo tawh a, sawrkar hotuten an bei zui ngai lo tih a sawi a ni.
  Hetiang a nih laia Home minister Pu K Sapdanga’n larsap thutlukna chu democracy palzutna tia a puh zui duh chu a vawi khat thlenna a ni tih a sawi a. Home minister ngei pawh hian thuneihna tawp neitu chu larsap a nih zia a press coinference-ah hian a sawi lang tho si niin a sawi bawk.
  “December 2024-a BJP-in CADC-a sawrkarna a siam dawn khan, chief minister leh District Council &Minority Affairs minister-te chuan larsap hnenah CADC chu Governor rule-a dah turin an lo ngen tawh a. Kum khat pawh ala ral hma a, CADC-a ZPM an sawrkar tir duh avanga an thu an thlak leh ta mai hi mak kan ti a. ZPM hian corruption-a inhnamhnawihte humhim a, rorelna khawla dah luih tlat an tum ta mai hi an party slogan nen a in hmeh lo hle,” a ti.
  Zawhna chhangin LADC-ah pawh sawrkarna siam thei loa buaina awm tho mah se, larsap-in ti tura a tih ang an tih duh tlat loh bakah court-a kal an awm tak zel avangin larsap tan inrawlh a rem ta rih lo tih BJP National secretary hian a sawi a. ADC-a anti defection law hman theiha dan siam turin BJP Mizoram chuan kum 2018 khan central hotute an lo ngen daih tawh a, tunah Bill siam tawhin a inchiah mek a, hman theihin dan awm thuai se an duh hle tih a sawi bawk.