Las Vegas sex worker-in mi suam

Nevada police te sawi danin Las Vegas-a sex worker pakhat chuan amah dawrtu tur nia rin mipa kum upa tawh lam mi chu sawisain nasa takin kut a thlak a, mipa awmna hotel room-ah hian phuar betin pawisa dollars sang tamtak a lak sak niin an sawi.
Las Vegas Metropolitan Police te chuan insuamna avanga report an dawn dawhzuiin he thil thleng hi Caesars Palace Hotel leh Casino ah niin kar hmasa maia thil thleng a nih thu an sawi bawk. New York Post-in a sawi danin police ten a hmun an va thlen hian mipa kum lama upa lam tawh chu sawisak a ni tih hriat takin hotel chhuat ah thisen kai nuaih chunga a mu an va hmu a. He pa thisen kai hnuang chunga chhuata mu an va hmuh chuan nawhchizuar pakhatin he hotel room-ah hian min hruaia min sawisa ta a ni, tiin police te chu a hrilh a ni. He pawikhawihtu hi man chhuah niin kum 26-a upa Napria Wilson a ni a, man a nih rual rual hian mi thah tum, chenna ina rukruk tum leh mi suam ching tih hmangin thubuai ziah luh nghal a ni. He vanduaina tawktu hian a wallet a laksak daih thu a sawi a ni. Hospital-a a hliam enkawl a nih mek laiin he pa hian thuneitute hrilhin Wilson hi Casino floor ah ka hmu a ka hotel room ah lo kal turin ka sawma hemi hnu hian min sawisa in min suam ta a ni, tiin a sawi.
He thil thleng hi October ni 27-a thil thleng niin Las Vegas Metro police te chuan Caesars Palace Las Vegas Hotel & Casino-a insuamna thil thleng awm anga report an dawn an bawhzuina a nih thu an sawi a. Security officer chuan mikhual room-a thawm a hriatna lam panin a kal a, mahse mipa thisena bual vek chhuata mu a va hmu ta a ni. Police te chuan CCTV kaltlangin Wilson-in mikhual room a kalsan mek chu hmuin elevator-a a lut leh helai hmun taxi hmanga a kalsan lai an hmu hman a ni. “Room ah hian Wilsoni’n a tihtur a tih zawh hnuin mipa hian $500 a pe a ni. Wilson hian pawisa chu la in roomah a awm rih a, minutes engemaw zat hnuah Wilson chuan pawisa pe leh turin mipa chu a dil leha mahse ka pe tawh che tiin a lo chhang ve thung a ni. Wilson chuan mipa hnenah hian thu pe aw takin pawisa chu pe leh ngei turin thu a intiam tir leh a ni” tiin New York Post chuan police te sawi dan a sawi chhawng a ni. Police-te chuan vanduaina tawk mipa hian sawisak a nih hnu hian pawisa $ 6,000 dawn lai a chan niah a inngai a, hliam chi hrang hrang a hmai ruh tliak te, a hmai hmun hrang hrangah pem a tamin a vung nasa em em bawka, a mit pawh a men theih loh thu an sawi a ni.