Last 16 lut nuamsa Real

Sithum faia an mikhual Sporting Braga sawp chungin Nilaini zanah Real Madrid chuan Group C atangin Champions League knock out round hmasaber an chuangkai.
Santiago Bernabeu inkhela goal hma-hruai hi Rodrygo siamsak atanga darkar chanve khelh tlin dawna Brahim Diaz thun niin, second half laihawl thlen hma deuhin Vinicius Junior chuan Lucas Vazquez thawhrah atangin mikhual goalkeeper Matheus dan zawh loh goal a thawh ve leh a; Spanish giants goal thumna erawh an goal hmasaber siamchhuaktu Rodrygo chanpual ni ve ta thungin, Vinicius Jr chhawpsak a ni thung.
Ti hian, khelh lia hnehna chang vek chungin La Liga club hian point 12 nen an hmahruaina an sawhnghet a, a zawn zatin season 26 chhung Champions League knockout stage an lut ta a ni.
A tir lamah Portuguese club Braga hian hmahruai theihna hun remchang bawhpelhin, Lucas Vazquez laka Cristian Borja hlawhchhuah penalty atanga Alvaro Djalo penalty pet chu Real goalkeeper Andriy Lunin chuan a dansak.
Lunin hi warm-up laia Kepa Arrizabalaga inhliam avanga tepter taka luhtir ve chauh a ni a, a chetha ta phian a ni.
Home team goal hmahruai khungtu Diaz-a goal khat dang pawh a intintuah chhoh laia Vinicius lo foul avangin hnawlsak a ni ve bawk.
Carlo Ancelotti team kha Champions League bika an home game khelh hnuhnung vawikuaah an tlawm lo fai vek a, an buzawla an khawngzia an lantir kal zel.
Nilaini zan inkhelah an thiampuipa rawn ni chho mek Jude Bellingham chu dar hliam avangin bench lamah thuttir a ni a, kumin nipui laia Real a zawm hnua Champions League match-a bul a tan loh vawikhatna chiah a ni.
Real hian an khelh leh tur Napoli an mikhual huna point khat chauh pawh an hmuhbelh leh chuan Group C hmahruaitu an ni hlen thei tawh dawn a; Italian club hian point sarih hum chungin pahnihna an luah.
Nilaini zan an group inkhel dangah Napoli leh an mikhual Union Berlin chu sikhat ve ve thunin an inhnehtawk a; Bundesliga club hian khelh li atanga an point khat hmuh chhun chu a mawngphah atanga talchhuahna’n an la hmang zo lo deuh!