Last 16 lut Satwik-Chirag leh Treesa-Gayatri

Copenhagen khawpuia World Badminton Championships khelh mekah Nilaini khan star Indian men’s doubles pair Satwiksairaj Rankireddy leh Chirag Shetty chuan straight-game hmanga Australian pair Kenneth Zhe Hooi Choo leh Ming Chuen Lim hnehin pre-quarterfinal an lut a; Indian women’s doubles pair Treesa Jolly leh Gayatri Gopi-chand tangdun pawhin straight-game hmang bawka Chang Ching Hui leh Yang Ching Tun of Chinese Taipei paltlangin round 3 an lut ve bawk.
World No. 2 pair Satwik leh Chirag thawkdun hian he cham-pionship hnuhnungberah khan a tumkhatna atan bronze medal an lo awrh tawh a, kuminah beiseina sang tak nen inlan chhunzawm lehin, Australian pair lakah darkar chanve lek chhunga 21-16, 21-9 hnehna changin round of 16 an lut.
Reigning Commonwealth Games champion Satwik leh Chirag inkawp hi kuminah chetha tluang mekin, title pali an la tling tawh a, an title pangana tur an beisei leh mekna kawngah Indonesian 10th seeds Leo Rolly Carnando leh Daniel Marthin inkawp an hmachhawn leh ang.
Commonwealth Games bronze medal changtu Treesa Jolly leh Gayatri Gopichand ve thung chu hmeichhe doubles lamah first round an bye zet a, second round-ah harsa lo taka hnehna changin, second round-ah Taiwanese world number 37th pair Chang leh Yang chu minute 38 chhungin 21-18, 21-10-in an hneh a, top seed Chinese pair Chen Qing Chen leh Jia Yi Fan lakah fiahna lian an paltlang a ngai dawn.
World number 19 Gayatri leh Treesa hian All England Cham-pionship hnuhnung pahnihah khan semi-final an lut ve ve a, World Championship kal mekah pawh hian thlengsang tur zinga rinluh an ni.