Last 32 lut Swiatek, Gauff leh Osaka

Last 32 lut Swiatek, Gauff leh Osaka
Rome khawpuia French Open inbuatsaihna clay-court tournament kal mek Italian Open-ah Ningani khan kum 2021 leh 2022 champion Iga Swiatek bakah grand slam champion hlui dang pahnih Coco Gauff leh Naomi Osaka-te’n nuamsa tak vekin third round an lut.
A vawithumna atana Rome title lak leh tum Polish world number one Swiatek hian American Bernarda Pera lakah darkar khat leh minute 17 lek chhungin 6-0 6-2 hnehna awlsam a chang a; American Gauff pawhin 6-3 6-3-a Poland nula Magdalena Frech a paltlangna kawngah darkar khat leh minute 28 bak khelmual chhungah hun a hmang lo.
Japanese star Osaka phei chuan 6-3 6-2-a world number 20 Marta Kostyuk of Ukraine hnehna’n darkar khat leh minute 11 chiah a mamawh a, a career-ah tun kha clay leilunga top 20 player a hneh vawikhatna a ni nghe nghe.
Third round lama world number 11 Daria Kasatkina hmachhawn zui leh tur Osaka chuan second round match tan dawn khan a tumpui tur Ukrainian Kostyuk chu clay leilunga amah aia tawnhriat nei tha zawk a nih thu leh amah chu giraffe note kal zir tir ang leka a inngaih thu a sawi a, tlawmna nun nena zirlai zirchhuah ngei tuma khelmual lut chauh a nih thu a sawi!
Inngaitlawm takin khelmual a lut a, clay leilung bika top 20 player la hneh ngai lo khan hmasawnna a tawngbaw zui ta a ni.