Lawmna ruai theh hnan tawh hnua dinhmun hniama dah leh an duh lo

Sawrkar enkawlna hnuaia dah tawh school engemawzat chu tun sawrkarin dah an nihna hi a hnukkir a, dinhmun tha zawka dah an nih avanga khawtlang mipuiin ruai nena an lo lawm tawh laia dah hniam leh an ni chu an duh loa, hma lak zel dan rel turin an inkokhawm dawn.
Mizoram Govt. Adhoc Aided School Teachers’ Union (MIGASTU) thuchhuak chuan, Mizoram sawrkarin 2023 October 1 khan school engemawzat sawrkar hnuaia a hlankai (government) tawh hnuah sawrkar tharin dinhmun hniam zawk (revoked) ah a dah leh tih a sawi a.
Sawrkarin a provincialise tawhte a hnuhkir leh chhanah thil fel lo nia a sawi thenkhat siamthat ngai zirchiang turin DP&AR minister Pu K Sapdanga kaihhruaia Study Team a din chu, kum khat a ral hnu pawhin tun thlengin an kalpui dan tur an la hre lo a, hei hi khawtlang leh zitirtute leh zirlaite ngaihpawimawh lohna leh thamlohnaah an ngai tih a sawi.
Mizoram sawrkar hnuaia department hrang hrangah, tun ministry chhunga hnathawk dahngheh an nihnaah Article 14 & 16 sawirik leh chelek a nih loh laiin, an ni chu open advertisement leh DPC(government approved) a lak, kum 17 service bu nena lo thawk tawh an nih hlawm bakah concern official atanga approve thlapa thawk an nih loiin, tuna taka rem leh rem loa a chunga Article 14 & 16 chelek tum a ni chu hriatthiam har an tih thu a sawi a ni.
‘Mizoram sawrkar hnuaia school upgradation kalpui tawh zawng zawngah Article 14 & 16 chelek loin tluang takin engkim tihfel a ni thin a. Sawrkar lai hian, sawrkar kal tawhte thil tih dan a tham loin thil dik lo ti tluk hialah a ngai nia lang thei hi a fel lo kan ti,’ MIGASTU chuan a ti.
MIGASTU member-te official hna, election hrang hrang leh census thlenga mawhphurhna an pek thin chu tha taka an chhunzawm zel theihnan sawrkara dahlet leh thuai an phut tih sawiin, ‘Provincialise kan nih khan, khawtlang leh mipuiin ruaipui thehin kan lawm tawh a, khawtlang leh mipui zah lo leh tham lo takin upgradation hi hnuhkir a ni. Mipui leh zirtirtute thamlohnaah kan ngai,’ a ti bawk.
School Education department-ah Study Team chairman nge Education minister zawkin thu nei tih hriathran harsa an ti hle tih an sawi a. Education minister an hmuhin Study Team-a kal tura a tih thin avangin a thanatthlak a, zirtirtute thamlohnaah an ngai tih a sawi.
Heng avanga lungawilohna lantirna atan leh thil pawimawh rel ho turin January 29 khian Aizawlah Special Conference a ko tih an sawi a. Mizoram sawrkar hnuaia Ad-hoc rules-in a phalsak anga hlawh an lak meka lungawi lo leh hlawh sang phut vang hrim hrima inkokhawm an ni lo tih an sawi lawk a ni.