Lawng pahnih chesualah Rohingya 427 vel thi

Lawng pahnih chesualah Rohingya 427 vel thi
United Nations chuan Myanmar-a sakhaw zuitu tlem zawk, Muslim mi, Rohingya 427 vel chu May 9 leh 10-a lawng pahnih chesualah an thi niin an sawi.
UN High Commissioner for Refugees (UNHCR)-in Zirtawpnia thuchhuah an siamah he thil hi a dik a nih chuan Rohingya telnaaah chuan kumina ‘tuipuia thihna nsa ber’ a nih tur thu an sawi.
“UN refugee agency chuan tun thla tira Myanmar vaukama lawng pahnih chesual nia sawi hi a ngaihven hle a ni,” tiin UNHCR chuan a sawi a, eng zat chiah nge thi tih an ngaihven mek tih a sawi.
Agency chuan an hriat theih chinah mi 267 phur lawng chu May 9 khan chesualin 66 an dam chhuak a. A tukah Rohingya 247 chuanna chesual lehin 21 chauh an dam chhuak a ni.
Lawnga chuang Rohingya-te hi Bangladesh-a Cox’s Bazar refugee camp atanga chhuak nge Myanmar khawthlang, Rakhine atanga chhuak tih hriat an ni lo.
Myanmar-a kum tam tak tihduhdah tawk tawh Rohingya sang tel hian an rama tihduhdahna leh tual chhung indona tlanchhiatsan tumin an bei nasa a, lawngleng rinawm lo leh siamchawp tak tak hmanga tlanchhia pawh an awm thin.
UNHCR High Commissioner Filippo Grandi chuan chetsualna lian tak pahnih hi Rohingya-ten ‘ngaihven an hlawh lohzia’ lantirna leh ‘Bangladesh-ah raltlanten harsatna an tawh nasatzia’ lantirtu a ni tih a sawi.
Kum 2017 khan Rohingya maktaduai tel chu Myanmar-a an awmna, Rakhine State-ah sipaiten an tihduhdah avangin an thenawm, Bangladesh-ah an tlanchhia.
Mi 1,80,000 zet chu Myanmar-a thawn let leh tura tih niin Rakhine-ah refugee camp-ah an dinhmun aia khirhah an awm leh dawn.
Kum 2021-a sipaiten Myanmar-a Aung San Suu Kyi-i kaihhruai mipui sorkar an paih thlak hnuah khan Rakhine-ah hian sipai leh anmahni duh lotu, Arakan Army inkarah indona nasa tak a chhuak mek bawk.
Tun tuma tuipuia thihna ang hi a thleng fo va, nikum khan Rohingya tlanchhiat tum 657 an thi niin UNHCR chuan a chhinchhiah.
United States-a President Donald Trump-a sorkarin tanpuitu pawl hnena sum a chhut luh thin a tihtlem bakah khawthlang ram dangten Russia leh China lian zel avanga an himna tur ngaihtuah a tum avanga sum an thawh a tlem bawk avangin raltlante puihna tur sum hi a tlem sawt hle.
UNHCR chuan Rohingya raltlante tana sum thawh turin ram dangte a ngen reng a. Kum 2025 chhung hian $ maktaduai 383 mamawh a nih thu an sawi a, heng zinga 30 chauh an la dawng niin an insawi.