Lawngtlai district-ah CD Ratio a tha

Kumin January atanga March inkar, 2022 -2023 chhunga Lawngtlai district-a bank hnathawh thlirnaah anmahni dawrtute sum dahluh atanga chhutin loan an pekchhuah dinhmun, Credit/Deposit Ratio chu a that viau laiin, mi harsa zawkte leh kuthnathawktute chhawr theih turin loan thenkhatah tan lak a tul tih sawi a ni.
Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) hi Nilaini khan sub-deputy commissioner Samuel Lalmalsawma Sailo hoin Lawngtlaiah an thukhawm a. 2023 January atanga March (4th quarter 2022-23) chhunga Lawngtlai district-a bank hrang hrangte hnathawh thlirlet niin, hmachhawp an neih leh hmalak zui dan turte sawi ho a ni.
Bank hrang hrang dinhmun thlir honaah Credit/Deposit Ratio-a national benchmark 60% a nih laiin, Lawngtlaia bank-te chuan CD Ratio 114.79% an nei a. CD ratio a that viau lai hian mipui harsa zawkte leh kuthnathawktute chhawr theih tur loan thenkhatah tan lak a tul thu sawi a ni. Agriculture kaihhnawih loan pek chhuah a tam zawk theihna’n line department leh bank lam ten tan la chho zel se, tih a ni a. Education loan pek leh puanzar lamah pawh tan lak nise, an ti.
Pawisa thir (coin) lengvel a tam theihna’n LDM leh bank lamin hma an laknaah hmasawnna a awm tih sawi niin, nasa zawka hma lak chhunzawm zel nise, pawisa hi lehkha aia thira siam a hautak loh zawk avangin thir her chhuah a tam deuh deuh thu te, pawisa thir chu pawisa lengvel atana ruahman a nih thu te, pawisa thir hman loh chuan dawr thil leh chawhmeh man bulthut (base price) a tihsan dan leh pawisa nawi awm loh chhuanlama pawisa nawi aia thil zawrh dang inkir mai emaw pawisa nawi inkir kim loh emaw a tihhluar dan te, chumiin tul loa mipui sum hmanral a tihpun thute sawi a ni. Heng harsatna hrang hrang hi sutkian a nih theihna’n district mipui, dawrkaite leh bank-te chu pawisa thir dawn leh hman kawngah tim lo tur leh hnar lo turin Committee chuan a ngen.
RBI-in Rs. 2000 note tlang a hnuhkir chungchang pawh sawi niin, Rs. 2000 tlang la kawlte tan 2023 September 30 thlengin bank-ah dah luh leh thleng theih a ni a, hemi hun tiam piahlamah hi chuan Rs. 2000 tlang hi tihthih a nih tawh dawn avangin huntiam chhunga tihfel tum vek turin DCC meeting chuan district mipui a ngen a ni.