Lawngtlaiah cyber crime sawi

Mizoram Journalists Association leh Home department buatsaihin Nilaini khan cyber crime chungchanga hriat tur pawimawh inhrilhna, Lawngtlaiah neih a ni a. Lawngtlai East bialtu MLA, adviser to CM Dr Lorrain Lalpekliana Chinzah chuan a hmanpui.
Internet-in hmasawnna tam tak, a tha leh tha lo lam a thlen mek a, a hmangtute fimkhur thiam a tul tih adviser to CM hian a sawi a. Mizoramah pawh social media hrang hrang kan hmang uar a, hei vang hian internet kaltlanga inbumna leh pawikhawihna chungchang hriatchian a tul hle tih a sawi.
Social media hmang thiam leh hmang tangkaite chuan sum thawk chhuakin, eizawnna tha tak pawh an nei ngei a, mah se a chhe zawnga hman avangin ram leh hnamin nasa takin a tuar thei tih hriat a pawimawh thu a sawi bawk.
“Social media platform hrang hrang hlimhlawp, nawmchenna leh mi sawisel zawnga hmanna a tam hle a, hei hian nakin lawkah thubuai lian tak awrh thei dinhmunah min siam thin tih hriat a tul. Cyber crime chungchang hriatchian loh avanga inbumna a hluar hle a, internet hmangtuten ‘cyber crime’ leh ‘cyber laws’ hriatchian tum hram hram ang u,” Dr Lorrain Lalpekliana Chinzah hian a ti.
Seminar hi MJA, Gen.Hqrs. president C Lalrambuatsaiha’n kaihruaiin, MJA Lawngtlai District president Elvis Lalthanzuala’n inlawmna thu a sawi a. Mizoram Cyber Crime deputy SP Jeremia Vanlalhmachhuana’n cyber crime lama hriat tur a zirtir a ni.
Sawm bik – SP office, Traffic Police, Lawngtlai District Vilage Council Association, Central Young Lai Association, Lai Students’ Association, Lawngtlai Auto Rickshaw Owners Association bakah DIPRO office leh Information department LADC an tel.