Lawngtlaiah raltlan 7794 awm
Lawngtlai district-ah Myanmar leh Bangladesh atanga raltlan mi 7794 an awm mek.
Lawngtlai DC office-in a chhinchhiah danin, tunah hian Lawngtlai district-ah Myanmar atanga raltlan 5922 (mipa puitling 1860; hmeichhe puitling 2049 leh kum 18 hnuailam 2013) an awm a; relief camp 38-ah leh khaw hrang hrang 55-ah an awm darh. Myanmar atanga raltlan lo lut chhinchhiah hnuhnung ber chu kumin April 25-a Hruitezawla lo lut an ni.
Bangladesh atanga raltlan 1872 (mipa puitling 580, hmeichhe puitling 499 leh kum 18 hnuailam 793) awmin, relief camp 12-ah leh khaw hrang hrang 11-ah an awm darh. Bangladesh atanga raltlan lo lut chhinchhiah hnuhnung ber chu kumin June 3 niin, hemi tum hian Chamdur P-I ah mi 28 (chhungkaw 11) an lo lut a ni.
Tuna Lawngtlai district-a raltlan awm mekte hi kum 2021 (Covid lai) atang khan lo lut tanin, a khat tawkin an lo luh belh zel a, kumin May-June hian Bangladesh atangin mi 191 an lo luh belh. Sawrkar leh tlawmngai pawl hrang hrang atanga tanpuina lut hmangin raltlante hi chhawmdawl thin a ni.
District Level Committee on Myanmar and Bangladesh Refugees Lawngtlai chu an chairman, district bawrhsap Cheemala Siva Gopal Reddy hoin an thukhawm a. Myanmar leh Bangladesh atanga raltlan lo lutte chungchanga sawi tur tul an sawi ho. Lawngtlai SP R Lokeshwaran bakah sawrkar official-te leh Central Young Lai Association hruaitu te an tel a. An district-a raltlan dinhmun leh hma lak a nih dan inhrilhfiah a ni.
Health department chuan raltlante tan a thlawna inentirna buatsaih, a thlawna damdawi sem, hri danna pek leh thosilen sem an kalpui tawh a. Tunhnaiah Chamdur ‘P’ leh Vathuampuiah free clinic buatsaih leh an tum mek. Raltlan lo lut vanga natna inkaichhawn theih a darh loh nan raltlante thlithlai leh a tul anga an dinhmun endik turin Health department atangin hma lak zel dan ngaihtuah nise, tih a ni. DCSO office chuan fur laia tla tur buhfai chhekkhawl hna an buaipui mek rualin, raltlante tana buhfai pek tur kep theih dan ngaihtuah nise, tih a ni. Sawrkar bakah Central YLA leh pawl dang atanga chhawmdawlna leh tanpuina pek thin dan sawi a ni bawk.